Indians in Ukraine: ఉక్రెయిన్ నుంచి భారత పౌరుల తరలింపులో భాగంగా రొమేనియా రాజధాని బుచారెస్ట్ నుంచి 200 మంది భారతీయులతో భారత వైమానిక దళం(ఐఏఎఫ్) విమానం.. హిండోన్ ఎయిర్ బేస్‌లో దిగింది. సీ-17 మిలిటరీ ట్రాన్స్‌పోర్ట్ ఎయిర్క్రాఫ్ట్ తొలి విమానం.. గురువారం తెల్లవారుజామున 1.30లకు దిల్లీలో ల్యాండ్ అయింది. ఉక్రెయిన్లోని భారత పౌరులను తరలించేందుకు చేపట్టిన ఆపరేషన్ గంగలో భాగంగా మరో మూడు సీ-17 విమానాల్లో దాదాపు 300 మంది భారత్కు చేరుకోనున్నారు. ఆ విమానాలు ఉదయం 8 గంటలకు హిండోన్ ఎయిర్‌బేస్‌లో దిగనున్నట్లు సమాచారం.
రక్షణ శాఖ సహాయ మంత్రి అజయ్ భట్ ఎయిర్‌బేస్ వద్ద తొలి సీ-17 విమానంలో తరలి వచ్చిన భారతీయులకు స్వాగతం పలికారు. ఉక్రెయిన్లో దాదాపు 8,000 మంది భారతీయులు, ప్రధానంగా విద్యార్థులు చిక్కుకుపోయారని విదేశాంగ కార్యదర్శి హర్ష్ వర్ధన్ శ్రింగ్లా మంగళవారం తెలిపారు. వారిని తరలించేందుకు నలుగులు కేంద్ర మంత్రులు ఉక్రెయిన్ పొరుగు దేశాలకు వెళ్లారు. హంగేరీలో హర్దీప్సింగ్ పూరి, రొమేనియాలో జ్యోతిరాదిత్య సింధియా, స్లోవేకియాలో కిరణ్ రిజిజు, పోలాండ్‌లో వీకే సింగ్ ఉన్నారు.