సీఎంకు నిరసన సెగ.. విమానంలో టెన్షన్​ టెన్షన్​!

విమాన ప్రయాణంలో కేరళ ముఖ్యమంత్రి పినరయి విజయన్​కు ఊహించని సంఘటన ఎదురైంది. యూత్​ కాంగ్రెస్​కు చెందిన ఇద్దరు కార్యకర్తలు నల్ల చొక్కాలు ధరించి, సీఎంకు వ్యతిరేకంగా నినాదాలు చేస్తూ నిరసన చేపట్టారు. ఈ దృశ్యాలు సామాజిక మాధ్యమాల్లో వైరల్​గా మారాయి.

ముఖ్యమంత్రి వెళ్తున్న విమానంలోనే ప్రయాణిస్తున్న ఇద్దరు యూత్​ కాంగ్రెస్​ కార్యకర్తలు నిరసనకు దిగారు. నల్ల చొక్కా ధరించి సీఎంకు వ్యతిరేకంగా నినాదాలు చేశారు. ఈ సంఘటన కేరళలోని కన్నూర్​ నుంచి తిరువనంతపురం​ వెళ్లే విమానంలో జరిగింది. ఆ రాష్ట్ర ముఖ్యమంత్రి పినరయి విజయన్​కు నిరసన సెగ తగిలింది. ప్రస్తుతం ఈ దృశ్యాలు సామాజిక మాధ్యమాల్లో వైరల్​గా మారాయి.

విజయన్​ ప్రయాణిస్తున్న విమానంలోనే ఉన్న ఇద్దరు యూత్​ కాంగ్రెస్​ కార్యకర్తలు నిరసనకు దిగారు. నల్ల చొక్కా ధరించి.. సీఎంకు వ్యతిరేకంగా నినాదాలు చేస్తూ ఆయనకు దగ్గరగా వెళ్లారు. అప్రమత్తమైన ఎల్​డీఎఫ్​ కన్వీనర్​ ఈపీ జయరాజన్​.. వారిని వెనక్కి నెట్టేశారు. వారు నినాదాలు చేస్తుండగా జయరాజన్​ వారిని తోసేస్తున్న వీడియోలు సామాజిక మాధ్యమాల్లో చక్కర్లు కొడుతున్నాయి. విమానంలో నిరసనలు చేపట్టిన యూత్​ కాంగ్రెస్ మట్టన్నుర్​ బ్లాక్​ అధ్యక్షుడు ఫర్సిన్​ మజీద్​, కన్నూర్​ జిల్లా సెక్రెటరీ ఆర్​కే నవీన్​ కుమార్​ను.. కన్నూర్​ విమానాశ్రయంలోనే పోలీసులు అడ్డుకున్నారు. అయితే, తాము వైద్యం కోసం తిరువనంతపురం​ వెళ్తున్నామని చెప్పగా అనుమతించినట్లు తెలిపారు.

శాంతియుతంగా నిరసన తెలుపుతున్న తమ కార్యకర్తల పట్ల ఈపీ జయరాజన్​ దురుసుగా ప్రవర్తించారని, వారిపై చేయి చేసుకున్నారని ఆరోపించింది యూత్ కాంగ్రెస్​. కొద్ది రోజుల క్రితం బంగారం స్మగ్లింగ్​ కేసులో సీఎం విజయన్​పై నిందితురాలు స్వప్న సురేశ్​ ఆరోపణలు చేశారు. ఆ తర్వాత రాష్ట్రవ్యాప్తంగా నల్ల జెండాలతో నిరసనలు చేపట్టాయి విపక్ష పార్టీలు.

ఇదీ చూడండి:'ఆన్​లైన్​ బెట్టింగ్'​పై కేంద్రం సీరియస్.. ఇక అవన్నీ బంద్!