కోల్​కతాలో ఎన్​కౌంటర్​ - ఇద్దరు గ్యాంగ్​స్టర్లు హతం

కోల్​కతా శివార్లలోని న్యూటౌన్​ ప్రాంతంలో బుధవారం ఎన్​కౌంటర్​ జరిగింది. పోలీసులు జరిపిన కాల్పుల్లో పంజాబ్​కు చెందిన ఇద్దరు గ్యాంగ్​స్టర్లు హతమయ్యారు. హత్య, దోపిడీ కేసుల్లో నిందితులు మోస్ట్​ వాంటెడ్​గా ఉన్నారని అధికారులు వెల్లడించారు.

పంజాబ్​కు చెందిన ఇద్దరు మోస్ట్​ వాంటెడ్​ క్రిమినల్స్​ను కోల్​కతాలో ప్రత్యేక కార్యదళం బుధవారం ఎన్​కౌంటర్​ చేసింది. ఈ క్రమంలో ఓ పోలీస్​ అధికారి కూడా గాయపడ్డారు. నిందితులను జైపాల్​ సింగ్ భుల్లర్​, జస్ప్రీత్​ సింగ్​లుగా గుర్తించారు.

పోలీసుల వివరాల ప్రకారం..

న్యూటౌన్​ ప్రాంతంలోని ఓ అపార్టుమెంట్​లో నిందితులు ఉన్నారని వివిధ రాష్ట్రాలకు చెందిన నిఘా సంస్థలు స్థానిక పోలీసులకు సమాచారం అందించాయి. ఈ మేరకు ప్రత్యేక కార్యదళం ఆ ప్రాంతానికి చేరుకుంది. అరెస్టుకు ప్రయత్నించగా అధికారులపై నిందితులు కాల్పులు జరిపారు. దాడిని ప్రతిఘటిస్తూ పోలీసులు జరిపిన ఎదురు కాల్పుల్లో నిందితులు మృతిచెందారు. ఈ క్రమంలో ఓ పోలీస్​ అధికారి కూడా గాయపడ్డారు.

ఘటనా స్థలం నుంచి రూ.7 లక్షల నగదు, 9 ఎంఎం పిస్టోళ్లు సహా పలు మారణాయుధాలను అధికారులు స్వాధీనం చేసుకున్నారు.

నిందితులపై రివార్డు..

పంజాబ్​లోని వివిధ హత్య, దోపిడీ కేసుల్లో నిందితులు మోస్ట్​ వాంటెడ్​గా ఉన్నారని అధికారులు వెల్లడించారు. వీరికి అంతర్రాష్ట్ర మారణాయుధ ముఠాలతో కూడా సంబంధాలు ఉన్నాయని తెలిపారు. జైపాల్​పై రూ.10 లక్షలు, జస్ప్రీత్​పై రూ.5 లక్షల రివార్డు ఉందని పేర్కొన్నారు. నిందితులు గత కొంతకాలంగా బంగాల్​లోని నేరస్థులకు మారణాయుధాలను సరఫరా చేస్తున్నారని పోలీసులు తెలిపారు.

ఇదీ చదవండి :మమతా బెనర్జీని కలిసిన రైతు నేతలు