ఉత్తరాఖండ్ చమోలీలో మరో రెండు మృత దేహాలు లభ్యమయ్యాయి. దీంతో మొత్తం మృతుల సంఖ్య 38కి చేరింది. ఒక మృతదేహాన్ని రిషి గంగా హైడెల్ ప్రాజెక్టు శిథిలాల్లో కనుగొనగా, మరో మృతదేహం మైథనా ప్రాంతంలో లభించింది. గల్లంతైన వారి ఆచూకీ కోసం సహాయక చర్యలు కొనసాగిస్తున్నట్లు అధికారులు స్పష్టం చేశారు.
వరదల ప్రభావానికి తెగిపోయిన వంతెనల స్థానంలో సైన్యం తాత్కాలిక వంతెనలను ఏర్పాటు చేసింది. బయట ప్రపంచంతో సంబంధాలు తెగిపోయిన సుకీ, లతా, భల్గావ్ గ్రామాలకు హెలికాప్టర్ల ద్వారా నిత్యావసర సరకులను అందిస్తోంది.
తపోవన్లో కొనసాగుతున్న చర్యలు..
తపోవన్ సొరంగంలో చిక్కుకున్న వారిని గుర్తించేందుకు సహాయక బృందాలు తీవ్రంగా శ్రమిస్తున్నాయి. డ్రిల్లింగ్ యంత్రం పాడవడం మూలాన గురవారం ఆగిపోయిన పనులను కొత్త యంత్రాల సాయంతో వేగవంతం చేశామని అధికారులు తెలిపారు.పైనున్న టన్నెల్‌ నుంచి కింది టన్నెల్‌కు వెళ్లేందుకు..డ్రిల్లింగ్ చేస్తున్నట్లు వెల్లడించారు. ఇప్పటివరకు 114 మీటర్ల మేర మట్టిని తొలగించామని తెలిపారు.
సొరంగంలో 180 మీటర్ల తర్వాత మలుపు ఉన్నందున అక్కడ ఎవరైనా ఉండొచ్చనే ఆశతో సహాయ చర్యలు కొనసాగిస్తున్నట్లు అధికారులు పేర్కొన్నారు. రిషి గంగా వద్ద ఏర్పడిన సరస్సును సమీక్షించేందుకు శాస్త్రవేత్తల బృందాన్ని పంపామని తెలిపారు.