Kappa Variant: ఆ రాష్ట్రంలో కప్పా వేరియంట్ కలకలం!

భారత్​లోని అతిపెద్ద రాష్ట్రంలో కప్పా వేరియంట్(Kappa Variant) కేసులు గుర్తించినట్లు అధికారులు తెలిపారు. సీఎం నిర్వహించిన సమీక్షా సమావేశంలో ఈ విషయాన్ని వెల్లడించారు.

ఉత్తర్​ప్రదేశ్​లో రెండు కరోనా కప్పా రకం(Kappa Variant) కేసులు వెలుగుచూశాయి. సీఎం యోగి ఆదిత్యనాథ్ శుక్రవారం నిర్వహించిన సమీక్షా సమావేశంలో అధికారులు ఈ విషయాన్ని వెల్లడించారు. ఈ మేరకు అధికారిక ప్రకటన విడుదల చేశారు.

గత కొద్ది రోజులుగా కింగ్ జార్జ్ వైద్య కళాశాలలో 109 నమూనాల జీనోమ్ సీక్వెన్సింగ్ నిర్వహించినట్లు అధికారులు తెలిపారు. అందులో 107 డెల్టా ప్లస్​ వేరియంట్​ కేసులు కాగా.. రెండు కేసులు కప్పా వేరియంట్లుగా నిర్ధరణ అయినట్లు చెప్పారు.

అయితే కప్పా, డెల్టా ప్లస్​ వేరియంట్ల గురించి ఆందోళన చెందాల్సిన అవసరం లేదని ఆరోగ్య శాఖ అదనపు కార్యదర్శి అమిత్​ మోహన్ ప్రసాద్​ తెలిపారు. రాష్ట్రంలో ఈ రెండు రకాల కేసులు గతంలోనూ వెలుగుచూశాయన్నారు. ఈ కేసులు ఏ జిల్లాల్లో నమోదయ్యాయో చెప్పేందుకు ఆయన నిరాకరించారు. చెబితే ఆ ప్రాంత ప్రజలు భయాందోళనకు గురవుతారని పేర్కొన్నారు.

ఇవీ చదవండి: కేరళలో జికా వైరస్​ విజృంభణ- మరో ముప్పుగా మారేనా?