ప్రముఖ కార్టూనిస్ట్ మంజుల్, ఫ్యాక్ట్చెక్ వెబ్సైట్ ఆల్ట్‌న్యూస్‌ సహ వ్యవస్థాపకుడు మహ్మద్ జుబైర్ సహా పలువురికి ట్విట్టర్ నోటీసులు జారీ చేసింది. చట్టాన్ని ఉల్లంఘించారన్న కారణంతో వారి ట్వీట్లను తొలగించాలని ప్రభుత్వ ఏజెన్సీలు సూచించిన నేపథ్యంలో ఈ నోటీసులు పంపినట్లు వెల్లడించింది. అయితే, ఏ సంస్థలు అడిగాయనే వివరాలను మాత్రం ట్విట్టర్ పేర్కొనలేదు. ట్విట్టర్ నుంచి తమకు అందిన నోటీసులను మంజుల్, జుబైర్ తదితరులు షేర్‌ చేశారు.
Twitter: పలువురు ప్రముఖులకు నోటీసులు - మంజూల్కు ట్విట్టర్ నోటీసులు
చట్టాలను ఉల్లంఘించారని ప్రభుత్వ ఏజెన్సీలు సూచించిన నేపథ్యంలో.. పలువురికి నోటీసులు పంపింది ట్విట్టర్. నోటీసులు అందిన వారిలో ప్రముఖ కార్టూనిస్ట్ మంజుల్, ఫ్యాక్ట్చెక్ వెబ్సైట్ సహ వ్యవస్థాపకుడు మహ్మద్ జుబైర్ సహా మరికొంత మంది ఉన్నారు.
ట్విటర్ నోటీసులు
మంజుల్‌కు పంపిన నోటీసులో 'ప్రభుత్వ చట్టాలను ఉల్లంఘించేదిగా ఉన్న @MANJULtoons ఖాతాలోని కొన్ని ట్వీట్లను తొలగించాలని ప్రభుత్వ ఎన్‌ఫోర్స్‌మెంట్‌ సంస్థల నుంచి విజ్ఞాపన వచ్చింది. ఈ విషయాన్ని మీ దృష్టికి తెస్తున్నాం. ప్రభుత్వం నుంచి ఇలాంటి విన్నపం వచ్చినప్పుడు యూజర్‌ దృష్టికి తీసుకెళ్లడం ట్విట్టర్ బాధ్యత' అని పేర్కొంది. 'కావాలంటే ఈ అంశంపై మీరు కోర్టును ఆశ్రయించవచ్చు. లేదంటే మీరు స్వచ్ఛందంగా సదరు ట్వీట్‌ను తొలగించవచ్చు' అని తెలిపింది. మహ్మద్ జుబైర్, రిటైర్డ్‌ ఐఏఎస్‌ అధికారి సూర్య ప్రతాప్‌ సింగ్‌ సైతం ఇలాంటి నోటీసులనే అందుకున్నారు. ఈ ముగ్గురికీ లక్షల్లో ఫాలోవర్లు ఉన్నారు.