CDS Chopper Crash: తమిళనాడు హెలికాప్టర్ ప్రమాదంలో భారత త్రిదళాధిపతి(సీడీఎస్) జనరల్ బిపిన్ రావత్ దుర్మరణం చెందిన ఘటనపై రక్షణ మంత్రిత్వ శాఖ ఏర్పాటు చేసిన ట్రై సర్వీస్ విచారణ మరో రెండు వారాల్లో పూర్తికానుంది. భారత వైమానిక దళంలో దేశంలోనే అత్యుత్తమ ఛాపర్ పైలట్ అయిన ఎయిర్ మార్షల్ మన్వేంద్ర సింగ్లతో పాటు ఆర్మీ, నేవీలకు చెందిన ఒక్కొక్క బ్రిగేడియర్ ర్యాంక్ అధికారుల నేతృత్వంలో విచారణ పూర్తి కానుంది.
"తమిళనాడు నీలగిరిలో ఛాపర్ క్రాష్ జరిగిన ప్రాంతానికి సమీపంలో ఉన్న వ్యక్తులను, కొందరు ప్రత్యక్ష సాక్షుల వాంగ్మూలాలను విచారణ కమిటీ నమోదు చేస్తుంది. అనంతరం రెండు వారాల్లో తన దర్యాప్తు పూర్తి చేస్తుందని భావిస్తున్నాం."
- అధికారులు
ఘటన జరిగిన మరుసటి రోజు నుంచే విచారణ బృందాలు తమ పని ప్రారంభించాయి. ఇందుకు సంబంధించిన వాంగ్మూలాలను నమోదు చేస్తున్నాయి. ఇప్పుడు ఏర్పాటు చేసిన విచారణ కమిటీలో ఎయిర్ మార్షల్తో పాటు విచారణలో ఉన్న ఇద్దరు అధికారులు దక్షిణ ఆర్మీ కమాండ్‌కు చెందిన వారు. వీరిరువురు ఛాపర్ సంబంధిత విషయాల్లో నిపుణులని అధికారులు తెలిపారు.
తమిళనాడులోని కోయంబత్తూర్-కూనూర్ మధ్యలో హెలికాప్టర్ ప్రమాదానికి గురై భారత త్రిదళాధిపతి(సీడీఎస్) జనరల్ బిపిన్ రావత్ దుర్మరణం చెందారు. వెల్లింగ్టన్ సైనిక కళాశాలలో జరిగే ఓ కార్యక్రమంలో పాల్గొనేందుకు వెళ్తున్న సమయంలో ఈ ప్రమాదం జరిగింది. ఈ ఘటనలో మొత్తం 14 మంది చనిపోయినట్లు వాయుసేన ప్రకటించింది.
ఇదీ చూడండి:
రసాయన కర్మాగారంలో భారీ పేలుడు- ఐదుగురు కార్మికులు మృతి
