Tractor Accident Today : ఎదురెదురుగా వస్తున్న ట్రాక్టర్, ట్రక్కు ఢీకొని ఆరుగురు భక్తులు ప్రాణాలు కోల్పోయారు. మరో ఎనిమిది మంది తీవ్రంగా గాయపడ్డారు. ఉత్తర్ప్రదేశ్.. హాథ్రస్ జిల్లాలోని సదాబాద్ రోడ్లో.. శుక్రవారం రాత్రి ఈ ఘటన జరిగింది.
ట్రాక్టర్, ట్రాలీలో మొత్తం 45 మంది భక్తులు ఉన్నారని పోలీసులు తెలిపారు. వీరిలో మహిళలు, చిన్న పిల్లలు కూడా ఉన్నారనివె ల్లడించారు. వీరంతా ఎటా జిల్లాలోని జలేసర్ నుంచి మథురలోని గోవర్ధన్‌కు వెళుతున్నారని వివరించారు.
ఈ ఘటనలో మృతులను విక్రమ్ (45), మాధురి (22), హేమలత (12), లక్ష్మీ (18), అభిషేక్ (20), విష్ణు (20)గా పోలీసులు గుర్తించారు. క్షతగాత్రులను స్థానిక ఆసుపత్రిలో చికిత్స నిమిత్తం చేర్పించినట్లు వెల్లడించారు. ప్రమాదానికి ట్రక్కు డ్రైవర్ నిర్లక్ష్యమే కారణమని పోలీసులు తెలిపారు. ముగ్గురిని అదుపులోకి తీసుకున్నట్లు చెప్పారు.
కాాగా సదాబాద్‌లోని కమ్యూనిటీ హెల్త్ సెంటర్, హాథ్రాస్ జిల్లా ఆసుపత్రి, అలీఘడ్లోని జేఎన్ మెడికల్ కాలేజీ, ఆగ్రాలోని ఎస్ఎన్ మెడికల్ కాలేజీలో క్షతగాత్రులకు చికిత్స జరుగుతున్నట్లు పోలీసులు తెలిపారు. మృతదేహాలను స్వాధీనం చేసుకుని పోస్ట్మార్టం కోసం పంపించినట్లు వారు వెల్లడించారు. ఘటనపై ఉత్తర్ప్రదేశ్ ముఖ్యమంత్రి యోగి ఆదిత్యనాథ్ విచారం వ్యక్తం చేశారు. మృతుల కుటుంబాలకు ప్రగాఢ సానుభూతి ప్రకటించారు.