శుక్రవారం రైతు సంఘాలు, కేంద్రం చర్చలు

సాగు చట్టాలపై ప్రతిష్టంభన నేపథ్యంలో కేంద్రం, రైతులకు మధ్య శుక్రవారం 9వ విడత చర్చలు జరగనున్నాయి. సమస్య పరిష్కారం కోసం సుప్రీంకోర్టు ఇటీవల కమిటీ ఏర్పాటు చేసిన నేపథ్యంలో ఈ భేటీ ప్రాధాన్యం సంతరించుకుంది.

కేంద్రం, రైతుల మధ్య తొమ్మిదో దఫా చర్చలపై సందిగ్ధం వీడింది. చట్టాలపై నలుగురు సభ్యులతో కూడిన బృందాన్ని సుప్రీంకోర్టు ఏర్పాటు చేసినప్పటికీ చర్చలు యథాతథంగా జరగనున్నాయి. ఈ విషయాన్ని కేంద్ర వ్యవసాయ శాఖ మంత్రి నరేంద్ర సింగ్ తోమర్ గురువారం స్పష్టం చేశారు. రైతులతో చర్చించడానికి ప్రభుత్వం సిద్ధంగా ఉందన్నారు. శుక్రవారం మధ్యాహ్నం 12 గంటలకు చర్చలు ప్రారంభమవుతాయని తెలిపారు.

చర్చలు అవసరం..

ఈ చర్చలపై భారతీయ కిసాన్ యూనియన్ నేత రాకేశ్ టికాయత్​ స్పందించారు. రైతు సంఘాలు చర్చలకు హాజరవుతాయని స్పష్టం చేశారు. సమస్య పరిష్కారం కావాలంటే చర్చలు జరగాల్సిందే అని అన్నారు.

"చూద్దాం శుక్రవారం ఏం జరుగుతుందో. ఏది ఏమైనా పరిష్కారం లభించే వరకు ప్రభుత్వంతో చర్చలు జరుగుతూనే ఉంటాయి."

-రాకేశ్​ టికాయత్, భారతీయ కిసాన్ యూనియన్ నేత​

ప్రభుత్వంతో జరిగే చర్చలను తాము వ్యతిరేకించమని అన్నారు.

ఇదీ చదవండి :'సుప్రీం' కమిటీ నుంచి తప్పుకున్న భూపేంద్ర