'కేరళ ప్రతిష్ఠను దెబ్బతీసేందుకే మోదీ యత్నం'

కేరళ ప్రతిష్ఠను దెబ్బతీసేందుకే భాజపా, కాంగ్రెస్​లు ప్రయత్నిస్తున్నాయని ఆ రాష్ట్ర ముఖ్యమంత్రి పినరయి విజయన్ ఆరోపించారు. రాష్ట్ర మనుగడను అంతం చేయాలనుకున్నవారే ఇప్పుడు అభివృద్ధి గురించి మాట్లాడుతున్నారని ఆ పార్టీలనుద్దేశించి వ్యాఖ్యానించారు. తన సొంత జిల్లా కన్నూర్​లో పోటీ చేస్తున్న వామపక్ష అభ్యర్థి తరుపున ఎన్నికల ప్రచారంలో పాల్గొన్నారు.

గత ఐదేళ్ల నుంచి కేరళ మనుగడను, వృద్ధిని అంతం చేయాలనుకున్నవారే నేడు అభివృద్ధి గురించి మాట్లాడుతున్నారని భాజపా, కాంగ్రెస్​లను ఉద్దేశిస్తూ కేరళ ముఖ్యమంత్రి పినరయి విజయన్​ ధ్వజమెత్తారు. ఇది కేరళవాసులను ఎగతాళి చేయడమేనని అన్నారు. కేరళ ప్రతిష్ఠను దెబ్బతీయడానికే ప్రధానమంత్రి నరేంద్ర మోదీ సహా భాజపా, కాంగ్రెస్​లు ప్రయత్నిస్తున్నాయని ఆరోపించారు. తన సొంత జిల్లా కన్నూర్​లో పోటీ చేస్తున్న వామపక్ష అభ్యర్థి తరుపున ఎన్నికల ప్రచారంలో పాల్గొన్నారు.

"మత విభజన చేయడానికి ఆర్​ఎస్​ఎస్​ చేసే ఏ ప్రయత్నాలు కేరళలో ఫలించవు. లౌకికత్వ పునాదులు ఇక్కడ బలంగా ఉన్నాయి. సంఘ్​ పరివార్​ అజెండా ముందు కేరళవాసులు తలవంచనందుకే ఇక్కడ నీతులు చెబుతున్నారు. ఓటుతో వారిని శిక్షించండి. కాంగ్రెస్​, భాజపాల భాయీ-భాయీ సంబంధం, ఎల్​డీఎఫ్​ చేసిన అభివృద్ధి గురించి ఇక్కడ అందరికీ తెలుసు. గత అసెంబ్లీ ఎన్నికల్లో కేరళను ప్రధాని మోదీ.. సోమాలియాతో పోల్చారు. ఈ రాష్ట్రాన్ని చీకటి కోణంలో చూపించడానికే సంఘ్​ పరివార్​ ఆసక్తి చూపుతుంది."

-పినరయి విజయన్​, కేరళ ముఖ్యమంత్రి

'ఒక్క సీటైనా వచ్చేనా?'

రాష్ట్రంలో భాజపా ఒక్క సీటు గెలుచుకోవటం కష్టమేనని విజయన్​ అన్నారు. గత ఎన్నికల్లో వచ్చిన ఓటు బ్యాంకును కూడా పొందలేదని జోస్యం చెప్పారు. దేశంలో ఇంకెన్ని రాష్ట్రాలను భాజపా పరం చేస్తారని కాంగ్రెస్​నుద్దేశించి ఎద్దేవా చేశారు. ఏప్రిల్​ 6న జరిగే ఎన్నికల్లో ప్రజలు సరైన సమాధానం ఇస్తారని తెలిపారు. వరదల సమయంలో కేంద్ర బలగాలను సహాయానికి పంపి.. అందుకు అయిన వ్యయాలపై బిల్లులను పంపించిందని కేంద్రాన్ని దుయ్యబట్టారు​. అదే సమయంలో.. రాష్ట్ర బలగాలు, మత్స్యకారులు ఉచితంగానే సేవ అందించారని కొనియాడారు.

ఇదీ చదవండి:అసోం మంత్రికి ఈసీ షాక్​.. ప్రచారంపై నిషేధం