శబరిమల అయ్యప్ప గుడిలో కరోనా కలవరం

ఎన్నో ఆంక్షలు విధించినప్పటికీ.. శబరిమల దేవస్థానంలో కరోనా మహమ్మారి తన ప్రభావం చూపతూనే ఉంది. ఇప్పటి వరకు మొత్తం 39 మందికి పాజిటివ్​గా తేలినట్లు అధికారులు తెలిపారు. భక్తులు సహా వివిధ శాఖలకు చెందిన ఉద్యోగులు వైరస్​ బారిన పడిన వారిలో ఉన్నారని చెప్పారు.

కఠిన ఆంక్షల మధ్య తెరుచుకున్న శబరిమల అయ్యప్ప ఆలయంలో కరోనా కలవరం సృష్టిస్తోంది. ఇప్పటి వరకు 39 మందికి కరోనా పాజిటివ్​గా నిర్ధరణ అయినట్లు ఆలయ అధికారులు తెలిపారు. వైరస్​ బారిన పడినవారిలో భక్తులు సహా పోలీసులు, ఆలయ సిబ్బంది ఉన్నట్లు వెల్లడించారు.

వివిధ శాఖలకు చెందిన 27 మంది ఉద్యోగులకు పాజిటివ్​గా నిర్ధరణ అయినట్లు ట్రావెన్​కోర్​ దేవస్థానం బోర్డు తెలిపింది. వారిని సత్వరమే.. కొవిడ్​ చికిత్స కోసం తరలించినట్లు వెల్లడించింది.

"ట్రావెన్​కోర్​ దేవస్థానం బోర్డుకు చెందిన నలుగురు ఉద్యోగులు కరోనా బారినపడ్డారు. ఇద్దరు తాత్కాలిక ఉద్యోగులు, మరో ఇద్దరు పోలీసులకు పాజిటివ్​గా తేలింది. మొత్తం 39 మందికి వైరస్​ సోకింది. శబరిమలలోని సన్నిధానం, పంబా, నీలక్కల్​ క్యాంపుల్లో వీరికి పాజిటివ్​గా నిర్ధరణ అయింది."

-- ట్రావెన్​కోర్​ దేవస్థానం బోర్డు.

వార్షిక మండల పూజకోసం నవంబర్​ 16 నుంచి ఆలయంలోకి భక్తుల ప్రవేశం కల్పిస్తున్నారు. ఈ నేపథ్యంలో కరోనా కట్టడి కోసం అధికారులు కఠిన చర్యలు తీసుకుంటున్నారు. 10 నుంచి 60 ఏళ్ల వయస్సు ఉన్నవారినే దర్శనానికి అనుమతినిస్తున్నారు. కేరళలోని వివిధ ప్రాంతాల్లోని బస్సు స్టేషన్లు, రైల్వే స్టేషన్లు యాంటీజెన్​ పరీక్షా కేంద్రాలను ఏర్పాటు చేశారు. తగిన స్థాయిలో వైద్య సిబ్బందిని నియమించారు.

శబరిమలలో కీలకమైన మండల పూజ డిసెంబర్​ 26న జరగనుంది. జనవరి14న జరిగే మకరవిళక్కు పూజ అనంతరం.. జనవరి 20న ఆలయాన్ని అధికారులు మళ్లీ మూసివేయనున్నారు.

ఇదీ చూడండి:శబరిమల భక్తులకు స్టీల్ బాటిళ్లలో ఔషధ జలం