'సారీ.. మీ దగ్గర అప్పుడు రూ.700 కొట్టేశా.. ఇప్పుడీ డబ్బు తీసుకోండి!'

ఆ వ్యక్తి అనేక ఏళ్ల క్రితం ఓ దొంగతనం చేశారు. కానీ.. ఇప్పటికీ అపరాధ భావం వెంటాడుతోంది. అందుకే ఇన్నేళ్ల తర్వాత బాధితులకు లేఖ రాశారు. తనను క్షమించాలని కోరుతూ డబ్బును తిరిగి పంపారు. ఇదంతా ఎక్కడంటే..

"చాలా ఏళ్ల క్రితం మీ దగ్గర రూ.700 విలువైన సరకు దొంగతనం చేశా. ఇప్పుడు ఈ రూ.2000 తీసుకుని నన్ను క్షమించండి" అంటూ వచ్చిన లేఖ.. కేరళలోని ఓ మహిళను ఆశ్చర్యంలో ముంచెత్తింది. అసలు ఈ లేఖను ఎవరు పంపారా అని ఆమె ఆలోచనలో పడింది.
మేరీ.. కేరళ వయనాడ్ జిల్లా పుల్పల్లి సమీపంలోని పట్టనికూప్​ వాసి. భర్త జోసెఫ్​ పదేళ్ల క్రితం మరణించాడు. అప్పటి నుంచి ఆమె ఒంటరిగా ఉంటోంది. బుధవారం ఆమెకు ఓ లేఖ వచ్చింది. క్రిస్మస్ సమయంలో పిల్లలు, బంధువుల నుంచి గ్రీటింగ్ కార్డులు తప్ప.. ఆమెకు ఎప్పుడూ పోస్ట్​లో ఉత్తరాలు రావు. అందుకే ఈ లేఖ ఎవరు పంపి ఉంటారా అని ఆమె ఆసక్తిగా చూసింది. కానీ.. కవర్​పై పంపిన వ్యక్తి పేరు లేదు.

'సారీ.. మీ దగ్గర అప్పుడు రూ.700 కొట్టేశా.. ఇప్పుడీ డబ్బు తీసుకోండి!'

అలానే అనుమానంగా కవర్ తెరిచి చూసింది మేరీ. లోపల ఓ లేఖ, నాలుగు రూ.500 నోట్లు ఉన్నాయి. "ప్రియమైన మేరీ అక్క.. చాలా ఏళ్ల క్రితం నేన జోసెఫ్​ దగ్గర రూ.700 విలువైన సామగ్రి దొంగిలించా. ఇప్పుడు ఆ సరకు విలువ రూ.2000 ఉంటుంది. ఈ లేఖతో పాటు ఆ డబ్బులు పంపుతున్నా. ఇవి తీసుకుని నన్ను క్షమించండి" అని ఉంది.
భర్త కూడా లేనందున ఈ లేఖ ఎవరు రాశారో ఇప్పుడు తెలుసుకోలేనని అంటోంది మేరీ. మిగిలిన దొంగలు కూడా ఇదే తరహాలో పశ్చాత్తాపం పొందితే బాగుంటుందని ఆశాభావం వ్యక్తం చేసింది.