రాజకీయ అరంగేట్రంపై విజయ్​ క్లారిటీ

ప్రముఖ నటుడు విజయ్​.. త్వరలో రాజకీయాల్లోకి ప్రవేశించనున్నారన్న వార్త సామాజిక మాధ్యమాల్లో వైరల్​గా మారింది. తాజాగా దీనిపై స్పందించారు విజయ్​. తన పేరుతో నమోదైన పార్టీతో తనకు ఎలాంటి సంబంధం లేదని తేల్చిచెప్పారు.

తన రాజకీయ అరంగేట్రంపై వస్తున్న ఊహాగానాలకు ప్రముఖ నటుడు విజయ్​ చెక్​ పెట్టారు. తన పేరుతో నమోదైన పార్టీతో తనకు ఎలాంటి సంబంధం లేదని స్పష్టం చేశారు. తన కోసం ఆ పార్టీలో చేరవద్దని అభిమానులకు తెలిపారు విజయ్​.

ఆ వార్తతో..

విజయ్​కు దేశవ్యాప్తంగా అభిమానులు ఉన్నారు. 'అఖిల భారత తలపతి విజయ్​ మక్కల్​ ఇయక్కమ్​' ఫ్యాన్​ క్లబ్​ కూడా ఉంది. తాజాగా ఈ క్లబ్​ను రిజిస్ట్రేషన్​ కోసం ఎన్నికల సంఘం వద్ద దరఖాస్తు చేశారు విజయ్​ తండ్రి, డైరక్టర్​ ఎస్​ఏ చంద్రశేఖర్​. ఈ వార్త సంచలనం సృష్టించింది. విజయ్​ రాజకీయ రంగ ప్రవేశం చేయబోతున్నారని ఊహాగానాలు జోరందుకున్నాయి.

ఈ పూర్తి వ్యవహారంపై విజయ్​ తాజాగా ఓ ప్రకటన విడుదల చేశారు. తన కార్యకలాపాలతో పార్టీకి ఎటువంటి సంబంధం లేదని తెలిపారు.

విజయ్​ రాజకీయ ప్రవేశంపై వస్తున్న వార్తలను చంద్రశేఖర్​ కూడా ఖండించారు. క్లబ్​ రిజిస్ట్రేషన్​ వ్యవహారం పూర్తిగా తన చేతుల మీదుగానే జరిగిందని.. దీనితో విజయ్​కు సంబంధం లేదని స్పష్టం చేశారు.

విజయ్ రాజకీయ ప్రవేశంపై తమిళనాడు ముఖ్యమంత్రి పళనిస్వామి కూడా స్పందించారు. ప్రజాస్వామ్యంలో ఎవరైనా రాజకీయాల్లోకి రావొచ్చని వ్యాఖ్యానించారు.

ఇదీ చూడండి:-అమర వీరులకు నివాళిగా 'భారత యాత్ర-2'