దిల్లీ సహా.. దేశంలోని ప్రధాన నగరాల్లో దాడులు చేసేందుకు కుట్ర పన్నిన వివిధ తీవ్రవాద గ్రూపులకు చెందిన నలుగురు ఉగ్రవాదులను జాతీయ దర్యాప్తు సంస్థ(ఎన్ఐఏ) అదుపులోకి తీసుకుంది. వారిని జమ్ముకశ్మీర్లోని శ్రీనగర్(Terrorism in Jammu and Kashmir)కు చెందిన వసీం అహ్మద్ సోఫీ, తారిక్ అహ్మద్ దార్, బిలాల్ అహ్మద్ మీర్ అలియాస్ బిలాల్ ఫాఫు, తారిఖ్ అహ్మద్ బఫండాగా గుర్తించింది. శ్రీనగర్, పుల్వామా, షోపియాన్ జిల్లాల్లో ఏకకాలంలో మంగళవారం నిర్వహించిన సోదాల్లో వీరిని అదుపులోకి తీసుకున్నట్లు ఎన్ఐఏ అధికారి ఒకరు తెలిపారు. ఉగ్రకుట్రలకు(Terrorist Attack) సంబంధించి అక్టోబర్ 10న కేసు నమోదు చేసి దర్యాప్తు ప్రారంభించింది ఎన్ఐఏ.
అరెస్టయిన వారంతా వివిధ నిషేధిత ఉగ్రవాద సంస్థల కోసం కిందిస్థాయిలో పనిచేస్తున్నట్లు ఎన్ఐఏ గుర్తించింది. ముష్కరుల కార్యకలాపాల్లో సహకరిస్తూ.. వారికి అవసరమైన సరకు రవాణాలో మద్దతిస్తున్నట్లు ప్రాథమిక దర్యాప్తులో వెల్లడైనట్లు తెలిపింది. 'మంగళవారం నిర్వహించిన సోదాల్లో అనేక ఎలక్ట్రానిక్ పరికరాలు, జిహాదీ సాహిత్యం, అనుమానాస్పద ఆర్థిక లావాదేవీల రికార్డులు స్వాధీనం చేసుకున్నట్లు ఎన్ఐఏ ప్రతినిధి వెల్లడించారు.
"నిషేధిత ఉగ్ర సంస్థలైన లష్కరే తోయిబా(ఎల్ఈటీ), జైషే మహ్మద్ (జేఈఈఎమ్), హిజ్బుల్ ముజాహిదీన్ (హెచ్‌ఎం), అల్ బదర్తో పాటు.. వాటి అనుబంధ సంస్థలైన రెసిస్టెన్స్ ఫ్రంట్ (టీఆర్‌ఎఫ్), పీపుల్ ఎగైనెస్ట్ ఫాసిస్ట్ ఫోర్సెస్ (పీఏఎఫ్ఎఫ్).. ప్రోద్బలంతో దేశంలోని ప్రధాన నగరాల్లో భౌతిక దాడులు చేసేందుకు కుట్రలు జరుగుతున్నాయి. "