ఒడిశా.. కేంద్రపాడా కలెక్టరేట్ ఎదుట జర్నలిస్టులు నిరసనకు దిగారు. జర్నలిస్టుపై మహిళా పోలీస్ అధికారి దాడిచేయటంపై ఆగ్రహం వ్యక్తం చేశారు. కలెక్టర్తో సమావేశమయ్యేందుకు వచ్చిన ఐదుగురు ఎమ్మేల్యేలను కూడా కార్యాలయంలోనే నిర్బంధించారు. మహిళా పోలీస్పై తక్షణమే చర్యలు తీసుకోవాలని డిమాండ్ చేశారు. ఎస్పీతో మాట్లాడి పోలీస్ అధికారిపై చర్యలు తీసుకుంటామని కలెక్టర్ హామీ ఇచ్చారు. దీంతో ఎమ్మెల్యేలను వదిలేశారు.
ఏం జరిగిందంటే..?
కేంద్ర్పాడా జిల్లా ఎస్పీ కార్యాలయం ముందు కొంతమంది భాజపా కార్యకర్తలు ధర్నాకు దిగారు. ఆ దృశ్యాలను చిత్రీకరించేందుకు జర్నలిస్టు భీమ్సేన్ సేతి అక్కడకు వెళ్లాడు. అదే సమయంలో మహిళా కానిస్టేబుల్ పూనా నాయక్.. మాస్కు ధరించకుండా విధులు నిర్వహిస్తున్నారు. ఆమె చిత్రాలను తీసిన జర్నలిస్టు.. సామాజిక మాధ్యమాల్లో పోస్టు చేశారు. దీంతో ఆగ్రహించిన కానిస్టేబుల్.. సేతిపై దాడి చేశారు ఈ దృశ్యాలు సామాజిక మాధ్యమాల్లో వైరల్ అయ్యాయి.
కానిస్టేబుల్ పూనా.. ఇతర పోలీస్ అధికారులు, రాజకీయ నేతలు చూస్తుండగానే తనపై దాడి చేశారని సేతి తెలిపారు. ఆమెను వెంటనే సస్పెండ్ చేయాలని, తనకు క్షమాపణ చెప్పించాలన్నారు.
ఇదీ చదవండి:'వాటర్గేట్ కుంభకోణం కంటే పెగాసస్ దారుణం'
