Tamil Nadu Rains Today :దక్షిణ తమిళనాడును భారీ వర్షాలు ముంచెత్తాయి. కుండపోత వర్షంతో అనేక లోతట్టు ప్రాంతాలు జలమయమై జనజీవనం అస్తవ్యస్తమైంది. ఫలితంగా దాదాపు 800 మంది ప్రయాణికులు తూతుకూడిలోని ఓ రైల్వేస్టేషన్‌లో చిక్కుకుపోయారు. తిరుచెందూర్ నుంచి చెన్నైకు బయలుదేరిన ఎక్స్ప్రెస్ రైలు అనేక గంటలుగా శ్రీవైకుంఠంలోని నిలిచిపోయినట్లు అధికారులు వివరించారు. వీరిని సురక్షితంగా బయటకు తీసుకువచ్చేందుకు ప్రయత్నాలు చేస్తున్నట్లు తెలిపారు.
"శ్రీ వైకుంఠంలోని రైల్వే స్టేషన్ చుట్టూ నీరు చేరింది. రైలు పట్టాలు దెబ్బతినడం వల్ల రైళ్లు రాకపోకలు సాగించే పరిస్థితి లేకపోయింది. దాంతో ప్రయాణికులు స్టేషన్‌లోనే చిక్కుకుపోయారు. ఆ స్టేషన్‌కు వెళ్లే రహదారి కూడా దెబ్బతినడం వల్ల సహాయక చర్యలకు ఆటంకం ఏర్పడింది. ప్రయాణికులంతా సురక్షితంగా ఉన్నారు. NDRF వారి వద్దకు వెళ్లేందుకు ప్రయత్నిస్తోంది. హెలికాప్టర్ల ద్వారా వారికి ఆహారం అందించేందుకు ప్రయత్నిస్తున్నాం" అని దక్షిణ రైల్వే ఒక ప్రకటనలో చెప్పింది.
కొండచరియలు విరిగిపడి భారీగా ట్రాఫిక్ జామ్
భారీ వర్షాల కారణంగా పాపనాశం, పెరుంజని, పెచుపారై డ్యాముల నుంచి నీటిని వదలడం వల్ల తిరునెల్వేలి, తూతూకుడి, తెన్కాసి జిల్లాలోని పలు ప్రాంతాల్లో భారీగా వరద చేరింది. తిరునల్వేలి జిల్లాలో వరద ముప్పుతో అనేక మందిని పునరావాస శిబిరాలకు తరలించారు. భారీ వర్షాలకు పశ్చిమ కనుమల్లోని కొండచరియలు విరిగిపడి తమిళనాడు, కేరళ రాష్ట్రాల మధ్య రవాణా వ్యవస్థ దెబ్బతింది. కొండచరియలు విరిగిపడడం వల్ల రెండు రాష్ట్రాలను కలిపే బొడి మెట్టు రోడ్డును అధికారులు మూసివేశారు. వాహనాలను అనుమతించకపోవడం వల్ల భారీగా ట్రాఫిక్ జామ్ ఏర్పడింది. కొండచరియలను తొలగించే పనులు చేపట్టామని, పూర్తైన తర్వాతే వాహనాలను అనుమతిస్తామని అధికారులు తెలిపారు. ప్రస్తుతం భారీస్థాయిలో ఎన్డీఆర్‌ఎఫ్, పోలీసు బలగాలను మోహరించింది ప్రభుత్వం. మత్స్యకారులు సముద్రంలోకి వెళ్లొద్దని హెచ్చరించింది.