Surat Diamond Bourse Inauguration : ప్రపంచంలోనే అతిపెద్ద కార్యాలయ సముదాయమైన సూరత్ డైమండ్ బోర్స్-ఎస్డీబీ మోదీ గ్యారంటీకి ఒక ఉదాహరణ అని ప్రధాని నరేంద్ర మోదీ అన్నారు. ఈ భవనం సరికొత్త భారత్ నూతన శక్తి, సంకల్పానికి నిదర్శనం అని అభివర్ణించారు. ఈ మేరకు సూరత్ డైమండ్ మార్కెట్ను ఆదివారం ప్రారంభించిన మోదీ ఆ తర్వాత జరిగిన సభలో మాట్లాడారు. మోదీ 3.0 ప్రభుత్వంలో భారత్ ప్రపంచంలోని మొదటి మూడు ఆర్థిక వ్యవస్థలలో ఒకటిగా ఉంటుందని తాను గ్యారంటీ ఇచ్చానని ఆయన చెప్పారు. తమ ప్రభుత్వం రాబోయే 25 ఏళ్లకు లక్ష్యాన్ని నిర్దేశించిందన్నారు. సూరత్ డైమండ్ బోర్స్ భారతీయ డిజైనర్లు, మెటీరియల్స్, భావనల సామర్థ్యాలకు ప్రతీకగా నిలుస్తుందని చెప్పారు. ప్రస్తుతం సూరత్ వజ్రాల పరిశ్రమ 8 లక్షల మందికి ఉపాధి కల్పిస్తోందని, ఈ కొత్త మార్కెట్ (ఎస్డీబీ)తో మరో 1.5 లక్షల ఉద్యోగాలు వస్తాయని ప్రధాని మోదీ తెలిపారు.
"సూరత్ వైభవానికి మరో వజ్రం తోడైంది. ఈ వజ్రం చిన్నది కాదు, ప్రపంచంలోనే అత్యుత్తమమైనది. ప్రపంచంలోని అతిపెద్ద భవనాలు కూడా ఈ వజ్రం మెరుపు ముందు తేలిపోయాయి. ప్రపంచంలో ఈ డైమండ్ బోర్స్ గురించి ఎవరైనా మాట్లాడినప్పుడల్లా సూరత్, భారత్ ప్రస్తావన వస్తుంది."
--నరేంద్ర మోదీ, భారత ప్రధాని
Surat Diamond Bourse Building : డైమండ్ కట్టర్లు, పాలిషర్లు, వ్యాపారులతో సహా 65వేల మంది వజ్రాల నిపుణులు ఈ కాంప్లెక్స్‌ కేంద్రంగా పనిచేయనున్నారు. ఇది రఫ్, మెరుగుపెట్టిన వజ్రాలు అలాగే ఆభరణాల వ్యాపారానికి ప్రపంచ కేంద్రంగా ఉండనుంది. వజ్రాల ఎగుమతి, దిగుమతుల కోసం అత్యాధునిక కస్టమ్స్ క్లియరెన్స్ హౌస్, రిటైల్ ఆభరణాల వ్యాపారం కోసం జ్యువెలరీ మాల్, అంతర్జాతీయ బ్యాంకింగ్, సురక్షితమైన వాల్ట్‌లు వంటి సౌకర్యాలతో ఈ కార్యాలయాన్ని నిర్మించారు. ఈ అతిపెద్ద కార్యాలయ సముదాయం ప్రపంచవ్యాప్తంగా డైమండ్ కట్టింగ్‌ క్యాపిటల్‌గా సూరత్ పేరును సుస్థిరం చేయనుంది. దాదాపు రూ.3,400 కోట్ల వ్యయంతో 35.54 ఎకరాల్లో హరిత భవనంగా నిర్మించిన ఈ కార్యాలయాన్ని నిర్మించారు. అత్యాధునిక హంగులతో రూపొందిన ఈ భవనం గురించి ఆసక్తికర విషయాలు తెలుసుకోవాలంటే ఈ లింక్పై క్లిక్ చేయండి.