మంచి కిడ్నాపర్లను అలా శిక్షించలేం: సుప్రీం

కిడ్నాప్ కేసులో తెలంగాణకు చెందిన ఓ వ్యక్తి దాఖలు చేసిన వ్యాజ్యంపై విచారణ జరిపిన సుప్రీంకోర్టు.. కీలక వ్యాఖ్యలు చేసింది. ఓ వ్యక్తిని కిడ్నాప్​ చేసి.. అతనికి ఎలాంటి హాని చేయకుండా చూసుకున్నట్లయితే.. సదరు కిడ్నాపర్​కు ఐపీసీ సెక్షన్​ 364ఏ ప్రకారం యావజ్జీవ కారాగార శిక్ష విధించేందుకు ఆస్కారం లేదని తెలిపింది.

ఓ వ్యక్తిని ఎవరైనా కిడ్నాప్​ చేసి వేధింపులకు గురిచేయకపోయినా, హత్య చేస్తానని బెదిరించకపోయినా, సదరు వ్యక్తిని బాగా చూసుకున్నా.. ఆ కిడ్నాపర్​కు ఐపీసీ సెక్షన్​ 364ఏ ప్రకారం యావజ్జీవ కారాగార శిక్ష విధించేందుకు ఆస్కారం లేదని సుప్రీం కోర్టు తెలిపింది. ఈ మేరకు జస్టిస్​ అశోక్​ భూషణ్​, జస్టిస్​ ఆర్​ సుభాశ్​ రెడ్డితో కూడిన ధర్మాసనం పేర్కొంది. తెలంగాణకు చెందిన ఓ ఆటోడ్రైవర్​.. దాఖలు చేసిన వ్యాజ్యంపై విచారణ జరిపిన న్యాయస్థానం ఈ వ్యాఖ్యలు చేసింది.

ఏంటీ కేసు?

సికింద్రాబాద్ సెయింట్​ మేరీ హైస్కూల్​కు చెందిన ఆరో తరగతి చదివే ఓ విద్యార్థి(13)ని 2011లో అహ్మద్ అనే ఆటోడ్రైవర్​​ కిడ్నాప్ చేశాడు. విద్యార్థి తండ్రి నుంచి రూ.2లక్షలు డిమాండ్​ చేశాడు. అయితే.. పోలీసులు ఆ బాలుడిని కాపాడారు. అనంతరం ఈ కేసు విచారణలో తనను కిడ్నాపర్​ ఎలాంటి హాని చేయలేదని తెలంగాణ హైకోర్టులో సదరు బాధితుడు, బాధితుడి తండ్రి తెలిపారు. అయినప్పటికీ.. ఐపీసీ 364ఏ సెక్షన్ కింద హైకోర్టు అహ్మద్​కు యావజ్జీవ కారాగార శిక్ష విధించింది. అయితే.. దీన్ని సవాలు చేస్తూ సుప్రీం కోర్టును అహ్మద్ ఆశ్రయించాడు.

సెక్షన్​ 364ఏ కింద శిక్ష విధించేందుకు మూడు ముఖ్యమైన నిబంధనలు ఉన్నాయని సుప్రీంకోర్టు ధర్మాసనం పేర్కొంది. డబ్బుల కోసమే కిడ్నాప్​ చేశాడనడానికి ఆధారాలు ఉన్నందున సెక్షన్​ 363(కిడ్నాప్​ చేసినందుకు శిక్ష) కింద మాత్రమే శిక్షకు అర్హుడవుతాడని చెప్పింది. ఈ సెక్షన్​ కింద అప్పీలుదారుడికి ఏడేళ్ల జైలు శిక్ష, రూ.5,000 జరిమానా విధించటం సహేతుకమని తెలిపింది.

ఇదీ చూడండి:బడుగులపై దాడులు- మారాలి పోలీసు ధోరణి

ఇదీ చూడండి:'ఫిరాయింపులపై పార్లమెంటుకే పూర్తి అధికారాలు'