'కరోనా టీకా తీసుకోవాలని ఎవరినీ బలవంతం చేయొద్దు'

COVID-19 vaccinations: కరోనా టీకా వేసుకోవాలని ఎవరినీ బలవంతం చేయొద్దని సూచించింది సుప్రీం కోర్టు. టీకా తీసుకోవటం వల్ల వచ్చే రోగనిరోధక శక్తిపై ప్రజలకు అవగాహన కల్పించాలని పేర్కొంది. ప్రస్తుతం నిర్వహిస్తున్న టీకాల పంపిణీ విధానంపై సంతృప్తి వ్యక్తం చేసింది.

COVID-19 vaccinations: కొవిడ్​-19 వ్యాక్సిన్​ తీసుకునేందుకు ఏ ఒక్కరిని బలవంతం చేయరాదని స్పష్టం చేసింది సుప్రీం కోర్టు. అయితే, టీకా వల్ల వచ్చే రోగనిరోధకత ప్రభావంపై ప్రజలకు అవగాహన కల్పించాలని కేంద్రానికి సూచించింది. రాజ్యాంగంలోని ఆర్టికల్​ 21 ప్రకారం ప్రతిఒక్కరికి తమ శరీరంపై స్వయం ప్రతిపత్తి ఉంటుందని జస్టిస్​ ఎల్​ నాగేశ్వరరావు, జస్టిస్​ బీఆర్​ గవాయ్​లతో కూడిన ధర్మాసనం అభిప్రాయపడింది. ప్రస్తుతం నిర్వహిస్తున్న వ్యాక్సినేషన్​ విధానంపై సంతృప్తి వ్యక్తం చేసిన ధర్మాసనం.. ఏకపక్షంగా, అసమంజసంగా ఉందని చెప్పలేమని పేర్కొంది. కొవిడ్​-19 వ్యాక్సిన్ల క్లినికల్​ ట్రయల్స్​, పోస్ట్​-జాబ్​ కేసులకు సంబంధించిన డేటాను బహిర్గతం చేసేందుకు ఆదేశాలు ఇవ్వాలని కోరుతూ జాకబ్​ పులియెల్​ దాఖలు చేసిన పిటిషన్​పై విచారణ సందర్భంగా ఈ మేరకు ఆదేశించింది.

"వ్యాక్సినేషన్​కు సంబంధించిన ఆదేశాలను పాటించాలి. బహిరంగ ప్రదేశాల్లో తిరిగేందుకు టీకా తీసుకోనివారిపై ఆంక్షలు విధించొద్దు. ఇప్పటికే అమలులో ఉన్న వాటిని తొలగించాలి. వ్యక్తుల గోప్యతకు లోబడి వ్యాక్సిన్​ ట్రయల్స్​ డేటాను ప్రజలకు అందుబాటులో ఉంచాలి."

- ధర్మాసనం.

వ్యక్తిగత గోప్యతకు లోబడి అందరికి అందుబాటులో ఉండే విభాగాల్లో వ్యాక్సిన్​ ప్రతికూల సంఘటనల వివరాలను పొందుపరచాలని కేంద్రాన్ని ఆదేశించింది సుప్రీం ధర్మాసనం. వ్యాక్సిన్​ తీసుకోని వారిపై కొన్ని రాష్ట్ర ప్రభుత్వాలు విధించిన ఆంక్షలను తొలగించాలని స్పష్టం చేసింది. ప్రజాప్రయోజనాల కోసం ప్రభుత్వం రూపొందించిన విధానంలో కొన్ని షరతులు విధించవచ్చని సుప్రీంకోర్టు తెలిపింది.

ఇదీ చూడండి:గ్యాంగ్​స్టర్​ ఇంటిపై పోలీసుల రైడ్.. కాసేపటికే బాలిక మృతి.. ఏమైంది?