Supreme Court On Dowry Demand: ఇంటి నిర్మాణం నిమిత్తం పుట్టింటి నుంచి డబ్బులు తీసుకురావాలని భార్యను కోరడం వరకట్నం డిమాండ్‌ చేయడం కిందకే వస్తుందని... సుప్రీంకోర్టు ప్రధాన న్యాయమూర్తి జస్టిస్‌ ఎన్‌.వి.రమణ నేతృత్వంలోని ధర్మాసనం స్పష్టం చేసింది. ఈ నేరానికి భారత శిక్షా స్మృతిలోని 304-బి నిబంధన కింద శిక్ష వర్తిస్తుందని తెలిపింది. కట్నం వేధింపులు తాళలేక ఓ ఇల్లాలు మృతిచెందిన కేసులో- ఆమె భర్త, మామలకు విచారణ న్యాయస్థానం శిక్ష విధించడం సరైనదేనని తేల్చి చెప్పింది. ఈ విషయంలో మధ్యప్రదేశ్‌ హైకోర్టు తప్పుగా భావించిందని పేర్కొంది.
ఏం జరిగిందంటే..
మధ్యప్రదేశ్‌కు చెందిన ఓ మహిళ... అదనపు కట్నం కోసం భర్త, మామలు పెడుతున్న వేధింపులు తాళలేక అత్తింటిలోనే ఆత్మహత్య చేసుకొంది. దీంతో వారిద్దరిపై కట్నం వేధింపులు, వరకట్న మరణం, ఆత్మహత్యకు ప్రేరేపించడం (ఐపీసీ 498-ఎ, 304-బి, 306 నిబంధనలు) కింద ఆరోపణలు నమోదయ్యాయి. విచారణ న్యాయస్థానం దోషులిద్దరికీ యావజ్జీవ కఠిన కారాగార శిక్ష విధించింది. అయితే, వారు దీన్ని సవాలుచేస్తూ హైకోర్టుకు వెళ్లగా... ఇల్లు కట్టుకోవడానికి మాత్రమే డబ్బులు అడిగారంటూ శిక్షను రద్దు చేసింది. ఈ నిర్ణయాన్ని వ్యతిరేకిస్తూ మధ్యప్రదేశ్‌ రాష్ట్ర ప్రభుత్వం సుప్రీంకోర్టుకు వెళ్లింది. ఈ వ్యవహారంపై జస్టిస్‌ ఎన్‌.వి.రమణ, జస్టిస్‌ ఎ.ఎస్‌.బోపన్న, జస్టిస్‌ హిమా కోహ్లీల ధర్మాసనం విచారణ సాగించింది. ఏదైనా ఆస్తిని లేదా 'వాల్యుబుల్‌ సెక్యూరిటీ'ని అడగడమూ వరకట్నం నిర్వచనం పరిధిలోకే వస్తాయంది. ఈ విషయంలో హైకోర్టు పొరపడిందని ధర్మాసనం వ్యాఖ్యానించింది. సమాజంలో వేళ్లూనుకున్న చీడను రూపుమాపాలన్నదే చట్టం తాలూకా మూల ఉద్దేశమన్న విషయాన్ని గమనంలో ఉంచుకోవాలంది. విచారణ న్యాయస్థానం దోషులకు శిక్ష విధించడం సరైనదేనని స్పష్టం చేసింది. అయితే శిక్షా కాలాన్ని ఏడేళ్లకు కుదిస్తున్నట్టు తెలిపింది.