చేతబడి చేశాడన్న అనుమానంతో కన్నతండ్రిని హత్య చేశాడు ఓ వ్యక్తి. తన భార్యను సైతం ఈ నేరంలో భాగం చేశాడు. ఘటన తర్వాత నిందితులు ఇద్దరు ఇంట్లో నుంచి పారిపోయారు. పోలీసులు రంగంలోకి దిగి.. ఈ కేసుపై దర్యాప్తు చేస్తున్నారు. ఝార్ఖండ్ పలామూ జిల్లాలోని మాఝియావ్ పోలీస్ స్టేషన్ పరిధిలో ఈ ఘటన జరిగింది.
మాఝియావ్కు చెందిన ధనుకీ(మృతుడు) తాంత్రికుడిగా పనిచేసేవాడు. కొద్దిరోజుల క్రితం తన కొడుకు బలరామ్తో ధనుకీ గొడవపడ్డాడు. ఈ ఘటన జరిగిన తర్వాత బలరామ్ చిన్న కొడుకు చనిపోయాడు. దీనికి తన తండ్రే కారణమని భావించిన బలరామ్.. అతడిపై కోపం పెంచుకున్నాడు. పూజల కోసం ధనుకీ బయటకు వెళ్లేందుకు సిద్ధమైన సమయంలో.. బలరామ్, అతడి భార్య కలిసి దాడి చేశారు. ధనుకీని తీవ్రంగా కొట్టారు. గాయపడ్డ అతడిని స్థానికులు పలామూలోని ఓ ఆస్పత్రికి తరలించారు. చికిత్స పొందుతూ ధనుకీ మరణించాడు. ఈ ఘటనపై ఎఫ్ఐఆర్ నమోదు చేసుకున్న పోలీసులు.. తదుపరి చర్యలకు సిద్ధమవుతున్నారు. నిందితులిద్దరూ పరారీలో ఉన్నారు.
హత్యలు చేసింది వారే..!
బెంగళూరులో కాంట్రాక్టర్ గోపాల్ రెడ్డి ఇంట్లో జరిగిన జంట హత్యల నిందితులను 48 గంటల్లోనే పట్టుకున్నారు కర్ణాటక పోలీసులు. గోపాల్ రెడ్డి వద్ద గతంలో డ్రైవర్గా పనిచేసిన జగదీశ్ అనే వ్యక్తే ఈ హత్యలకు పాల్పడినట్లు పోలీసులు చెప్పారు. కొరమంగళలో డిసెంబర్ 17న ఈ హత్యలు జరిగాయి. గోపాల్ రెడ్డి ఇంటి సెక్యూరిటీ గార్డు దిల్ బహదూర్, ఆయన వద్ద పనిచేసే వ్యక్తి కరియప్పను నిందితులు హత్య చేశారు. అనంతరం రూ.5లక్షల నగదు, వంద గ్రాముల బంగారు ఆభరణాలను చోరీ చేశారు.
రెండున్నర నెలల క్రితం జగదీశ్.. గోపాల్ రెడ్డికి చెందిన ఖరీదైన కారును తీసుకెళ్లి జల్సా చేసుకున్నాడు. దీనిపై ఆగ్రహం వ్యక్తం చేసిన గోపాల్ రెడ్డి.. జగదీశ్ను, అతడి కుటుంబాన్ని పోలీస్ స్టేషన్కు పిలిపించి హెచ్చరించాడు. అనంతరం పనిలో నుంచి తీసేసి కొత్త డ్రైవర్ను పెట్టుకున్నాడు. కొత్త డ్రైవర్తో పరిచయం పెంచుకున్న జగదీశ్.. గోపాల్ రెడ్డిపై నిఘా పెట్టాడు. ఆయన ఇంట్లో నుంచి బయటకు ఎప్పుడు వెళ్తున్నారనేది ఎప్పటికప్పుడు తెలుసుకున్నాడు. వివాహ వేడుకకు హాజరయ్యేందుకు డిసెంబర్ 15న గోపాల్ రెడ్డి.. తన కుటుంబంతో కలిసి ఆంధ్రప్రదేశ్లోని అనంతపురానికి వెళ్తున్నట్లు జగదీశ్కు తెలిసింది.
'ప్రతీకారం తీర్చుకునే సమయం వచ్చిందని భావించిన జగదీశ్.. తన స్నేహితుడు కిరణ్, అతడి సోదరుడు అభిషేక్తో కలిసి గోపాల్ రెడ్డి ఇంటికి వెళ్లాడు. ఆ ఇంటి గురించి జగదీశ్కు పూర్తిగా తెలుసు. ముందుగా అతడే గోడ దూకాడు. సీసీ కెమెరాల వైర్లను కట్ చేశాడు. సెక్యూరిటీ గదిలో ఉన్న దిల్ బహదూర్ను హత్య చేశాడు. అతడి బాడీని సంపులో పడేశాడు. తర్వాత కిరణ్, అభిషేక్తో కలిసి కాంపౌండ్లోకి వెళ్లాడు. ఉదయం పని మనిషి కరియప్ప ఇంటి తలుపులు తీసేంతవరకు అక్కడే వేచిచూశారు. డోర్ తీయగానే కరియప్పను చంపేశారు. అనంతరం బంగారం, నగదు తీసుకొని కారులో పరారయ్యారు' అని పోలీసులు తెలిపారు. నిందితులు బైదరహళ్లి, కునిగల్ ప్రాంతాల్లో పట్టుబడ్డారని పోలీసులు తెలిపారు. జగదీశ్పై మదనాయకనహళ్లి పోలీస్ స్టేషన్లోనూ ఓ కేసు ఉందని చెప్పారు. నిందితులు ముగ్గురికీ కోర్టు జ్యుడీషియల్ కస్టడీ విధించింది.
