ఆపరేషన్ కమలం 2024.. ఎన్​డీఏ గూటికి ఓం ప్రకాశ్ రాజ్​భర్

NDA Expansion : రాబోయే లోక్​సభ​ ఎన్నికలే లక్ష్యంగా ఎన్​డీఏను విస్తరించే పనిలో నిమగ్నమైంది బీజేపీ. అందులో భాగంగా ఉత్తర్​ప్రదేశ్​లోని S.B.S.P. అధినేత ఓం ప్రకాశ్ రాజ్​భర్ తిరిగి కూటమిలో చేరారు.

NDA Expansion Omprakash Rajbhar : వచ్చే సార్వత్రిక ఎన్నికలే లక్ష్యంగా ప్రతిపక్ష పార్టీలు ఏకమవుతున్న వేళ.. భారతీయ జనతా పార్టీ కూడా ఎన్​డీఏను బలోపేతం చేయటంపై దృష్టి సారించింది. పాతమిత్రులను తిరిగి ఎన్​డీఏ గూటికి తెచ్చేందుకు కొన్నిరోజుల నుంచి ముమ్మరంగా ప్రయత్నాలు చేస్తోంది. తూర్పు ఉత్తర్​ప్రదేశ్​లో ఓబీసీల్లో గట్టిపట్టున్న నేతగా గుర్తింపు పొందిన సుహెల్​దేవ్​ భారతీయ సమాజ్​ పార్టీ అధినేత ఓం ప్రకాశ్ రాజ్​భర్.. తిరిగి ఎన్​డీఏ గూటికి చేరారు. ఈ మేరకు తన కుమారుడు అరవింద్​ రాజ్​భర్​తో కలిసి కేంద్ర హోం శాఖ మంత్రి అమిత్​ షాను కలిసి ఎన్​డీఏలో చేరినట్లు ప్రకటించారు. 2024 సార్వత్రిక ఎన్నికల్లో బీజేపీతో కలిసి పనిచేయాలని నిర్ణయించినట్లు పేర్కొన్నారు.

'బీజేపీ, ఎస్​బీఎస్​పీ ఒక్కటయ్యాయి. దేశంలో సామాజిక న్యాయం, భద్రత, సుపరిపాలన, అణగారిన వర్గాలు, దళితులు, మహిళలు, రైతులు, యువత, బలహీన వర్గాల కోసం.. భారతీయ జనతా పార్టీ, సుహెల్​దేవ్​ భారతీయ సమాజ్​ పార్టీ కలిసి పోరాడతాయి.'
--ఓం ప్రకాశ్​ రాజ్​భర్​, ఎస్​బీఎస్​పీ అధినేత

ఎన్​డీఏలోకి తిరిగి వచ్చిన ఓం ప్రకాశ్​ రాజ్​భర్, ఆయన కుమారుడిని అమిత్ షా స్వాగతించారు. 'ఓం ప్రకాశ్​ రాజ్​భర్​ను దిల్లీలో కలిశాను. ప్రధాని నేతృత్వంలోని ఎన్​డీఏలోకి రావాలని ఆయన నిర్ణయించుకున్నారు. ఎన్​డీఏలోకి ఓం ప్రకాశ్​కు స్వాగతించాను. రాజ్​భర్​ రాకతో ఉత్తర్​ప్రదేశ్​లో కూటమి బలం పెరుగుతుంది. పేదలు, అణగారిన వర్గాల సంక్షేమం కోసం మోదీ నేతృత్వంలో ఎన్​డీఏ చేస్తున్న కృషికి మరింత బలం చేకూరుతుంది' అని ట్వీట్ చేశారు.

ఈనెల 18న జరిగే ఎన్​డీఏ సమావేశానికి హాజరుకానున్నట్లు రాజ్​భర్​ తెలిపారు. 2022 ఉత్తర్​ప్రదేశ్ శాసనసభ ఎన్నికల ముందు యోగి ఆదిత్యనాథ్ కేబినెట్ నంచి వైదొలిగిన రాజ్​భర్.. సమాజ్​వాదీ పార్టీతో చేతులు కలిపి ఎన్నికల్లో పోటీ చేశారు.
ఈనెల 18న నిర్వహించే ఎన్​డీఏ భాగస్వామ్యపక్షాల సమావేశంలో పాల్గొనాలని.. భాజపా అధ్యక్షుడు జేపీ నడ్డా ఇటీవల లేఖలు రాశారు.

'రేపు ఆయన ఎక్కడ ఉంటారో తెలియదు'
ఓం ప్రకాశ్ రాజ్​భర్​ తిరిగి ఎన్​డీఏలో చేరడంపై కాంగ్రెస్ ఎంపీ ప్రమోద్​ తివారీ స్పందించారు. ' రాజ్​భర్​​ ఎక్కడి నుంచి వచ్చారో అక్కడికే వెళ్లారు. ఇది కొత్తేమీ కాదు. ఈరోజు ఎక్కడ ఉన్నారో.. రేపు ఆయన ఎక్కడ ఉంటారో మీరు ఊహించలేరు' అని ఆయన అన్నారు.

'కేంద్రం నుంచి ఓం ప్రకాశ్ రాజ్‌భర్​పై ఒత్తిడి ఉంది. గతంలో ఆయన బీజేపీ నుంచి విడిపోయినప్పుడు.. బీజేపీ, ఆర్‌ఎస్‌ఎస్ వెనుకబడిన తరగతుల ప్రజలకు వ్యతిరేకమని.. తాను చనిపోయినా ఎప్పటికీ బీజేపీలో చేరనని చెప్పారు' అని సమాజ్​వాదీ పార్టీ అధికార ప్రతినిధి అమీక్ జమీ అన్నారు.

• ఇవీ చదవండి :