Kejriwal Sisodia Bharat Ratna: దిల్లీ ప్రభుత్వ పాఠశాలల్లో విద్యా ప్రమాణాలను సౌకర్యాలను మెరుగుపరిచిన ఉప ముఖ్యమంత్రి మనీశ్ సిసోదియా.. భారతరత్న పురస్కారానికి అర్హుడని ఆ రాష్ట్ర సీఎం కేజ్రీవాల్ కొనియాడారు. కానీ రాజకీయ కారణాలతో సిసోదియాను కేంద్ర ప్రభుత్వం వేధిస్తోందని ఆయన ఆరోపించారు. గుజరాత్ ఎన్నికల ప్రచారంలో పాల్గొన్న కేజ్రీవాల్.. దిల్లీ విద్యా నమూనాను న్యూయార్క్ టైమ్స్ ప్రశంసించిన విషయాన్ని గుర్తు చేశారు.
70 ఏళ్లలో ఏ రాజకీయ పార్టీ చేయలేని అభివృద్ధిని ఐదేళ్లలో చేసి అద్భుతం సృష్టించిన వ్యక్తిపై సీబీఐ దాడులు సిగ్గుచేటు కాదా అని కేజ్రీవాల్ ప్రశ్నించారు. భారతరత్న ఇవ్వాల్సిన వ్యక్తిపై ఇలాండి దాడులు ఏంటని నిలదీశారు. మనీశ్ సిసోదియాను అరెస్ట్ చేయవచ్చని, తనను కూడా అరెస్ట్ చేయవచ్చన్న కేజ్రీవాల్.. గుజరాత్ అసెంబ్లీ ఎన్నికలను దృష్టిలో ఉంచుకునే ఇదంతా చేస్తున్నారని విమర్శించారు. గుజరాత్‌లో ఆప్ అధికారంలోకి వస్తే ప్రజలకు నాణ్యమైన విద్య, వైద్యం అందిస్తామని హామీ ఇచ్చారు.
సిసోదియా సంచలన ట్వీట్‌!
మరోవైపు, కేజ్రీవాల్ సర్కార్‌ తీసుకొచ్చిన నూతన మద్యం పాలసీ వ్యవహారం దిల్లీ రాజకీయాలను కుదిపేస్తోంది. ఆప్‌ను వీడి భాజపాలో చేరితే తనపై ఉన్న కేసులన్నింటినీ ఎత్తివేస్తామని భాజపా నుంచి ఆఫర్‌ వచ్చిందంటూ ఈ ఉదయం సంచలన వ్యాఖ్యలు చేసిన దిల్లీ ఉపముఖ్యమంత్రి మనీశ్ సిసోదియా.. తాజాగా మరో సంచలన ట్వీట్‌ చేశారు. ఆప్‌ను చీల్చితే తనకు సీఎం పదవి ఇస్తామని భాజపా ఆఫర్‌ చేసిందని పేర్కొన్నారు.
తనను సీఎంను చేస్తామన్న ప్రతిపాదనకు తన సమాధానం ఇదీ అని పేర్కొన్న సిసోదియా.. కేజ్రీవాల్ తనకు రాజకీయ గురువు అని.. ఆయనకు తాను ఎప్పటికీ ద్రోహం చేయనన్నారు. తాను ముఖ్యమంత్రి కావడం కోసం రాలేదని.. దేశంలోని ప్రతి చిన్నారి బాగా చదువుకోవాలనేదే తన కల అని ట్వీట్‌ చేశారు. అప్పుడే భారతదేశం నంబర్‌ 1గా మారగలదని.. దేశంలో కేజ్రీవాల్ మాత్రమే ఈ పనిచేయగలరంటూ ట్వీట్‌ చేశారు.