Silicon statue Earring Ceremony: రోడ్డుప్రమాదంలో మరణించిన ఓ యువకుడి కుటుంబ సభ్యులు.. తమ ఇంట్లో జరిగిన వేడుకను వినూత్నంగా నిర్వహించారు. చెల్లెలి కూతురికి చెవులు కుట్టే కార్యక్రమంలో యువకుడి సిలికాన్ బొమ్మను ఏర్పాటు చేశారు. కార్యక్రమంలో ప్రత్యక్షంగా పాల్గొన్నాడా? అని అనిపించేలా ఈ విగ్రహాన్ని తయారు చేయించారు.
తమిళనాడు డిండిగుల్కు చెందిన పండిదురై రెండేళ్ల క్రితం ఓ ప్రమాదంలో చనిపోయాడు. తన చెల్లెలు ప్రియదర్శినితో పాటు, ఆమె పిల్లలపై అమితంగా ప్రేమ చూపించేవాడు. అనుకోకుండా రోడ్డు ప్రమాదంలో మరణించాడు.
పట్టుబట్టలు.. ఊరేగింపులు...
అయితే, అన్నయ్య సమక్షంలోనే తన పిల్లలకు చెవులు కుట్టే కార్యక్రమం నిర్వహించాలని ప్రియదర్శిని భావించింది. అతడు జీవించి లేకపోవడం వల్ల.. అతడిని పోలిన సిలికాన్ విగ్రహాన్ని తయారు చేయించారు కుటుంబ సభ్యులు. వేడుక సందర్భంగా సిలికాన్ విగ్రహానికి పట్టుబట్టలు తొడిగి ముస్తాబు చేశారు. విగ్రహాన్ని రథంపై ఉంచి.. ఊరేగింపు నిర్వహించారు. విగ్రహం ఒడిలో చిన్నారులను కూర్చోబెట్టి.. చెవులు కుట్టించారు.
మేనల్లుడు, మేనకోడలికి చెవులు కుట్టించాలన్న తమ కొడుకు కోరిక సైతం నెరవేరిందని కుటుంబ సభ్యులు ఆనందం వ్యక్తం చేస్తున్నారు. చెల్లెలు ప్రియదర్శిని సైతం సంతోషంగా ఉందని చెబుతున్నారు.
ఈ కార్యక్రమం స్థానికంగా చర్చనీయాంశంగా మారింది. చుట్టుపక్కలవారు సిలికాన్ విగ్రహాన్ని చూసేందుకు పోటెత్తారు. బెంగళూరులో ఈ విగ్రహాన్ని తయారు చేయించారు. ఇందుకు రూ.5 లక్షలు ఖర్చయింది.
ఇదీ చదవండి:కొనఊపిరితో చిన్నారి.. పనిచేయని ఆక్సిజన్ యంత్రం.. డాక్టర్ ఐడియాతో...
