వేర్వేరు సంస్థలు అభివృద్ధి చేసినా కరోనా వ్యాక్సిన్‌లను మిక్సింగ్‌ విధానంలో ఇవ్వడంపై ప్రపంచ వ్యాప్తంగా పరిశోధనలు జరుగుతున్నాయి. ఈ నేపథ్యంలో వ్యాక్సిన్‌ మిక్సింగ్‌పై సీరం ఇన్‌స్టిట్యూట్‌ ఆఫ్‌ ఇండియా ఛైర్మన్‌ సైరస్ పూనావాలా (Cyrus Poonawalla) స్పందించారు. వ్యాక్సిన్‌ డోసులను మిశ్రమ పద్ధతిలో ఇచ్చే అవసరం లేదని పేర్కొన్నారు. ఈ ప్రక్రియలో ఒక వేళ ఏదైనా తప్పు జరిగితే వ్యాక్సిన్‌ తయారీ సంస్థల మధ్య నిందారోపణలు వచ్చే అవకాశం ఉంటుందన్నారు. ప్రయోగ దశల్లో వీటిపై పూర్తి స్థాయిలో అధ్యయనాలు జరగలేదనే విషయాన్ని పూనావాలా గుర్తుచేశారు. పుణెలోని తిలక్‌ మహారాష్ట్ర విద్యాపీఠ్‌లో జరిగిన ఓ కార్యక్రమంలో సైరస్ పూనావాలా ఈ విధంగా స్పందించారు.
'బూస్టర్ డోస్ మంచిది'
మరోవైపు కొవిషీల్డ్ మూడో లేదా బూస్టర్ డోసు తీసుకోవడం మంచిదని సైరస్ పునావాలా పేర్కొన్నారు. "ఆరు నెలల తర్వాత యాంటీబాడీలు తగ్గుతాయి. అందుకే నేను మూడో డోసు తీసుకున్నాను. 7 నుంచి 8 వేల మంది సీరం ఉద్యోగులకు బూస్టర్ డోస్ ఇచ్చాం. రెండో డోసు తీసుకున్నవారికి ఇదే నా అభ్యర్థన.. ఆరు నెలల తర్వాత బూస్టర్ డోస్ తీసుకొండి."అని ఆయన పేర్కొన్నారు.