రాహుల్​ అంటే కేంద్రానికి వణుకు: శివసేన

కాంగ్రెస్​ నేత రాహుల్ గాంధీ అంటే ఎన్​డీఏ ప్రభుత్వానికి భయమని ఆసక్తికరమైన వ్యాఖ్యలు చేసింది శివసేన పార్టీ. రాహుల్​ ఓ యోధుడని ప్రశంసించింది. ఈమేరకు పార్టీ పత్రిక 'సామ్నా'లో సంపాదకీయం రాసింది.

కాంగ్రెస్​ నేత రాహుల్​ గాంధీ అంటే కేంద్రానికి భయమని ఆసక్తికరమైన వ్యాఖ్యలు చేసింది శివసేన. "మోదీ ప్రభుత్వానికి వ్యతిరేకంగా పోరాడుతోన్న యోధుడు రాహల్"​ అని ప్రశంసించింది.

రాహుల్​ గాంధీ తిరిగి కాంగ్రెస్​ పార్టీ అధ్యక్షుడు అయితే... అది చాలా మంచి విషయమని శివసేన పార్టీ పత్రిక సామ్నాలో పేర్కొంది. "రాహుల్​ గాంధీకి అధికార పార్టీ భయపడుతోంది. గాంధీ కుటుంబాన్ని కించపరిచేందుకు ర్యాలీలు చేయడమే ఇందుకు నిదర్శనం. ఒక్కరు వ్యతిరేకత చూపినా పాలకుడికి భయం మొదలవుతుంది. రాహుల్​ విమర్శల నేపథ్యంలో ప్రస్తుతం ఇదే జరుగుతోంది" అని సామ్నా పత్రికలో పేర్కొంది శివసేన.

రాహుల్​ బలవంతుడు కాకపోయినా ప్రభుత్వాన్ని నిలదీసేందుకు తనకు వచ్చే ప్రతి అవకాశాన్నీ వినియోగించుకుంటున్నారని శివసేన తెలిపింది. కాంగ్రెస్​ను బలోపేతం చేసి కేంద్రానికి దీటైన ప్రతిపక్ష కూటమిగా నిలవాలని శివసేన ఎంపీ సంజయ్​ రౌత్​ ఇటీవలే చేసిన వ్యాఖ్యలకు మద్దతుగా ఆ పార్టీ ఈ వ్యాఖ్యలు చేసింది.

ఇదీ చదవండి:'యూకే విమానాలను అప్పటివరకు ఆపాల్సిందే'