'పవార్​కు ఆపరేషన్- నిలకడగా ఆరోగ్యం'

ఎన్​సీపీ అధినేత శరద్ పవార్​కు వైద్యులు ఎండోస్కోపీ నిర్వహించి పిత్తాశయంలోని రాళ్లు తొలగించారని మహారాష్ట్ర వైద్య శాఖ మంత్రి రాజేశ్ తోపే తెలిపారు. ప్రస్తుతం ఆయన పరిస్థితి నిలకడగా ఉందని చెప్పారు.

కడుపునొప్పితో ఆసుపత్రిలో చేరిన ఎన్​సీపీ అధినేత శరద్​పవార్​కు వైద్యులు.. మంగళవారం రాత్రి ఆపరేషన్ నిర్వహించారని మహారాష్ట్ర వైద్య శాఖ మంత్రి రాజేశ్ తోపే తెలిపారు. ఎండోస్కోపీ ద్వారా పిత్తాశయం(గాల్​బ్లాడర్)లోని రాళ్లను తొలగించారని చెప్పారు. ప్రస్తుతం ఆయన ఆరోగ్యం నిలకడగా ఉందని అన్నారు.

పవార్​కు వైద్య పరీక్షలు నిర్వహించిన అనంతరం.. శస్త్రచికిత్స చేయాలని నిర్ణయం తీసుకున్నట్లు ఆస్పత్రి వైద్యుడు అమిత్ మాయ్​దేవ్ వెల్లడించారు. ఈ చికిత్స అరగంట పాటు కొనసాగిందని చెప్పారు. పిత్తాశయాన్ని పూర్తిగా తొలగించే విషయంపై తర్వాత నిర్ణయం తీసుకోనున్నట్లు స్పష్టం చేశారు. పవార్​ను ప్రస్తుతం పరిశీలనలో ఉంచినట్లు వివరించారు.

ఇటీవల అస్వస్థతకు గురైన ఎన్​సీపీ అధినేత శరద్​ పవార్​ మంగళవారం.. ముంబయిలోని బ్రీచ్​ క్యాండీ ఆస్పత్రిలో చేరారు. పొత్తికడుపులో నొప్పి రావడం వల్ల ఆస్పత్రిలో చేర్చినట్లు పార్టీ వర్గాలు తెలిపాయి.

ఇదీ చదవండి:'అమిత్​ షా-పవార్​ల మధ్య భేటీ జరగనేలేదు'