అన్నాడీఎంకే, ఎన్డీఏలు పేద ప్రజల సంక్షేమం గురించి ఆలోచిస్తే.. కాంగ్రెస్, డీఎంకే పార్టీలు మాత్రం అవినీతిపై దృష్టి పెడుతున్నాయని కేంద్ర హోం మంత్రి అమిత్ షా విమర్శించారు. ఇరుపార్టీలు విభజించు, పాలించు విధానాన్ని అనుసరించి రాజకీయాలు చేస్తున్నాయని ధ్వజమెత్తారు. సోనియా గాంధీ ఆలోచన అంత రాహుల్ని ఎలా ప్రధానమంత్రిని చేయాలి అనే దానిపై ఉందని ఎద్దేవా చేశారు. ఉదయనిధిని తమిళనాడుకు ముఖ్యమంత్రిని చేయడం గురించి స్టాలిన్ ఆందోళన చెందుతున్నారని పేర్కొన్నారు. తమిళనాడు విల్లుపురంలో విజయ్ సంకల్ప్ ర్యాలీలో పాల్గొన్న ఆయన ఈ వ్యాఖ్యలు చేశారు.
"ఉదయనిధిని సీఎం చేయాలనేది స్టాలిన్ లక్ష్యం. రాహుల్‌ను ప్రధాని చేయాలనేది సోనియా కోరిక. కాంగ్రెస్, డీఎంకేలు 2జీ కుంభకోణంలో భాగస్వాములు. 2జీ, 3జీ, 4జీ లాంటి అన్ని జనరేషన్లు తమిళనాడులోనే ఉన్నాయి. 2జీ అంటే 2 తరాల మారన్ కుటుంబం. 3జీ అంటే 3 తరాల కరుణానిధి కుటుంబం. 4జీ అంటే 4 తరాల గాంధీ కుటుంబం. వీరికి ప్రజా సంక్షేమం కంటే అవినీతే ముఖ్యం."