'భారత్-సీషెల్స్ మైత్రి ప్రత్యేకం'

భారత్ అవలంబించే విధానాల్లో సీషెల్స్​కు కీలక స్థానం ఉందని ప్రధానమంత్రి నరేంద్ర మోదీ అన్నారు. కరోనా సమయంలో సీషెల్స్​కు అండగా నిలిచామని, కొవిడ్ అనంతరం కూడా ఈ సహకారం కొనసాగుతుందని చెప్పారు. బిహార్ మూలాలు ఉన్న ఆ దేశ ప్రధానిని భారత దేశ ముద్దుబిడ్డగా అభివర్ణించారు.

హిందూ మహాసముద్ర ప్రాంతంలో భారత్, సీషెల్స్ దేశాల మధ్య కీలకమైన భాగస్వామ్యం ఉందని ప్రధానమంత్రి నరేంద్ర మోదీ అన్నారు. 'సెక్యూరిటీ అండ్ గ్రోత్ ఫర్ ఆల్ ఇన్ ది రీజియన్'(సాగర్) అనే భారతదేశ విధానంలో సీషెల్స్​ది ముఖ్యమైన స్థానమని చెప్పారు. సీషెల్స్ అధికారులతో జరిగిన అత్యున్నత సమావేశంలో వర్చువల్​గా పాల్గొన్నారు మోదీ.

కరోనా పోరులో సీషెల్స్​కు అండగా ఉంటామని ప్రధాని స్పష్టం చేశారు. కరోనా సమయంలో అత్యవసర ఔషధాలతో పాటు 50 వేల టీకా డోసులను అందించినట్లు చెప్పారు. కొవిడ్ అనంతరం ఆర్థిక పునరుద్ధరణకూ సీషెల్స్​కు అండగా ఉంటామని హామీ ఇచ్చారు. ఈ సందర్భంగా సీషెల్స్ ప్రధాని వావెల్ రామ్​కలావన్​ను భారత ముద్దుబిడ్డగా అభివర్ణించారు. ఆయన మూలాలు బిహార్​లోని గోపాల్​గంజ్​లో ఉన్నట్లు చెప్పారు.

సీషెల్స్​కు రూ.100 కోట్ల నౌక

భారత సహకారంతో నిర్మించిన సీషెల్స్ మేజిస్ట్రేట్స్ కోర్టు భవనాన్ని ఈ సమావేశంలో ప్రారంభించారు. కరోనా సంక్షోభంలోనూ కోర్టు భవన నిర్మాణాన్ని పూర్తి చేసినట్లు ప్రధాని పేర్కొన్నారు. ఇందులో భాగస్వామ్యం అయినందుకు ఆనందంగా ఉందని చెప్పారు. సీషెల్స్​తో సముద్రతీర భద్రతను మరింత బలోపేతం చేసేందుకు భారత్ కట్టుబడి ఉందని చెప్పారు మోదీ. రూ.100 కోట్లతో భారత్​లో తయారు చేసిన గస్తీ నౌకను ఆ దేశ కోస్ట్​ గార్డ్​కు అందించారు.

ఇదీ చదవండి:బంగ్లాదేశ్​ పర్యటనలో భారత ఆర్మీ చీఫ్​