NDPS Act: పురుషుల్లో వీర్య వృద్ధికి ఉద్దేశించిన వనమూలిక మాత్రలకు 'మాదకద్రవ్యాల చట్టం' వర్తించదని సోమవారం స్పష్టం చేసింది సుప్రీంకోర్టు. ఈ మాత్రలు కలిగి ఉన్నారన్న కారణంతో తమిళనాడుకు చెందిన కొందరు వ్యక్తులను డైరెక్టరేట్‌ ఆఫ్‌ రెవెన్యూ ఇంటెలిజెన్స్‌ (డీఆర్‌ఐ) అధికారులు అరెస్టు చేశారు. ఆ మాత్రలను స్వాధీనం చేసుకున్నారు. అయితే అందులో ఒకరికి గత ఏడాది నవంబరులో ట్రయల్‌ కోర్టు బెయిల్‌ ఇచ్చింది. దీన్ని మద్రాసు హైకోర్టు కొట్టివేసింది.
Sex enhancement drugs case: దీనిపై నిందితుడు సుప్రీంకోర్టులో అప్పీలు చేయగా ప్రధాన న్యాయమూర్తి జస్టిస్‌ ఎన్‌.వి.రమణ, జస్టిస్‌ సూర్యకాంత్‌, జస్టిస్‌ హిమా కోహ్లీలతో కూడిన ధర్మాసనం విచారణ జరిపింది. స్వాధీనం చేసుకున్న మాత్రలు 'మాదకద్రవ్యాల చట్టం' (నార్కోటిక్‌ డ్రగ్స్‌ అండ్‌ సైకోట్రోపిక్‌ సబ్‌స్టాన్సస్‌ యాక్ట్‌- ఎన్‌డీపీఎస్‌) పరిధిలోకి రావని తెలిపింది. వ్యాపారం కోసమే ఈ మాత్రలు చేశారన్నదానికి ఎలాంటి స్పష్టతా ఇవ్వలేదని పేర్కొంది. మరో నిందితుడు రెండేళ్లుగా జైలులో ఉండడం, అభియోగపత్రాల దాఖలు పూర్తవడం కారణంగా అతనికి బెయిల్‌ మంజూరు చేయడానికి అవకాశాలను పరిశీలించవచ్చని ట్రయల్‌ కోర్టుకు సూచించింది.