Cerebral palsy girl in Kerala: కేరళ ఇడుక్కిలోని కల్లార్లో సెరెబ్రల్ పాల్సీ అనే వ్యాధితో బాధపడుతున్న చిన్నారి పాఠశాలకు వచ్చి చదువుకోవాలనే కలను సాకారం చేశారు సిబ్బంది. అంతేగాకుండా ఆమెకు ఎప్పటికీ గుర్తుండేలా తొలిరోజున అపూర్వ స్వాగతం పలికారు సహ విద్యార్థులు. ఆ బాలిక రాక కోసం తరగతి గదిని అందంగా తీర్చిదిద్దారు. రంగు రంగుల బెలూన్లతో క్లాస్ రూంను అలంకరించారు. దివ్యాంగురాలైనా కానీ.. చదువుకోవాలనే తన కోరికకు మరింత బలం చేకూర్చేలా ప్రతి ఒక్కరు చిన్నారి సెరాకు బహుమతులు ఇచ్చి ప్రోత్సహించారు. స్కూల్ సిబ్బంది కూడా తమ వంతుగా ఆ బాలిక చదువుకోవాలనే సంకల్పానికి కట్టుబడి.. వీల్ ఛైర్ వచ్చేందుకు వీలుగా రెండో అంతస్తులో ఉన్న తరగతి గదిని గ్రౌండ్ ఫ్లోర్కి మార్చారు.
కోరిక మేరకు..
బాల్యం నుంచే చిన్నారి సెరా సెరెబ్రల్ పాల్సీతో బాధపడుతోంది. దీంతో పాఠశాల చదువుకు ఐదేళ్ల పాటు దూరం కావాల్సి వచ్చింది. అందరు పిల్లల లాగే తనకూ బడికి వెళ్లి చదువుకోవాలని ఉందనే కోరికను తన అమ్మానాన్నల ముందు ఉంచింది సెరా. కూతురు కోరిక మేరకు ఆమె తల్లిదండ్రులు కల్లార్లోని ప్రభుత్వ పాఠశాలకు వెళ్లి సిబ్బందిని కలిసి విషయం చెప్పారు. ఇందుకు అధికారులు కూడా సానుకూలంగా స్పందించారు. చిన్నారి క్లాస్ లోకి వెళ్లేందుకు సులభంగా ఉండేలా ఆరో తరగతి గదిని రెండో అంతస్తు నుంచి గ్రౌండ్ ఫ్లోర్కు మార్చారు. వీల్ ఛైర్ వచ్చేందుకు వీలుగా రోప్ ఏర్పాటు చేశారు.