రఫేల్ యుద్ధవిమానాల ఒప్పందం కొద్ది రోజుల క్రితం మరోసారి వివాదాస్పదమైంది. తాజా ఆరోపణల నేపథ్యంలో కొత్తగా దాఖలైన ప్రజాప్రయోజన వ్యాజ్యంపై రెండు వారాల తర్వాత సుప్రీం కోర్టు విచారణ జరపనుంది. ఈమేరకు ప్రధాన న్యాయమూర్తి సోమవారం నిర్ణయం తీసుకున్నారు.
రఫేల్ యుద్ధవిమానాల ఒప్పందం మొదటి నుంచి వివాదాలకు కేంద్ర బిందువుగానే ఉంటోంది. దాదాపు వారం రోజుల క్రితం మరోసారి దానిపై సంచలన కథనం వెలువడింది. ఈ విమానాల తయారీదారు దసో ఏవియేషన్ భారత్‌కు చెందిన ఒక మధ్యవర్తికి 10,17,850 యూరోల (రూ.8.8 కోట్లు)ను చెల్లించినట్లు ఫ్రెంచ్ పోర్టల్ ‘మీడియా పార్ట్‌’లో కథనం ప్రచురితమైంది. ఫ్రాన్స్‌ అవినీతి నిరోధక విభాగం దర్యాప్తు ఆధారంగా ఈ కథనాన్ని ప్రచురించినట్లు పేర్కొంది.