హత్యాచారం​ కేసులో దోషికి శిక్షను సవరించిన సుప్రీంకోర్టు

SC modifies sentence of rape: మైనర్​పై అత్యాచారం, హత్య కేసులో దోషికి విధించిన శిక్షను సవరించింది సుప్రీంకోర్టు. అతను మరణించేవరకు జైలు శిక్ష అనుభవించాలని హైకోర్టు ఇచ్చిన తీర్పుకు మార్పులు చేసింది. దోషికి 30 ఏళ్ల జైలు శిక్ష అమలు చేయాలని ఆదేశించింది.

SC modifies sentence of rape: 10ఏళ్ల బాలికపై అత్యాచారం చేసి అనంతరం ఆమెను హత్య చేసిన కేసులో దోషికి హైకోర్టు విధించిన శిక్షను సవరించింది సుప్రీంకోర్టు. దోషి సహజమరణం పొందే వరకు జైలులోనే ఉండాలని హైకోర్టు తీర్పు ఇవ్వగా.. దాన్ని కాస్త సవరించి అతనికి 30 ఏళ్ల కారాగార శిక్ష ఖరారు చేసింది సర్వోన్నత న్యాయస్థానం. శిక్షాకాలం మాత్రం తగ్గించవద్దని స్పష్టం చేసింది. జస్టిస్​ ఎల్​ నాగేశ్వర్​ రావు, జస్టిస్​ హృషికేశ్​లతో కూడిన ధర్మాసనం ఈ మేరకు బుధవారం తీర్పు వెలువరించింది. ఈ సందర్భంగా ఐపీసీ సెక్షన్ 376-ఏను ప్రస్తావించింది.

"అప్పీలుదారు నేరారోపణకు సంబంధించి దిగువ కోర్టుల తీర్పుకు భంగం కలిగించకుండా, సహజ జీవితకాల యావజ్జీవ కారాగార శిక్షను 30 సంవత్సరాలకు సవరించాలని మేము భావిస్తున్నాము. సెక్షన్​ 376-ఏ ప్రకారం ఇలాంటి నేరాల్లో దోషికి 20 సంవత్సరాలకు తగ్గకుండా జైలు శిక్ష విధించాలి. ఆ తర్వాత శిక్షా కాలాన్ని పొడిగించవచ్చు." అని ధర్మాసనం పేర్కొంది.

ఈ కేసులో దోషికి ట్రయల్స్​ కోర్టు మొదట మరణశిక్ష విధించింది. సెక్షన్​ 376-ఏ, 302, 363, 201, పోక్సో చట్టం కింది ఈ శిక్ష ఖరారు చేసింది. అయితే అతను హైకోర్టును ఆశ్రయించగా.. మరణ శిక్షను యావజ్జీవ కారాగార శిక్షగా మార్చింది న్యాయస్థానం. అతను సహజ మరణం పొందేవరకు జైలు శిక్ష అనుభవించాలని ఆదేశించింది. తాజాగా సుప్రీంకోర్టు దీన్ని కూడా సవరించింది.

ఇదీ చదవండి:సుప్రీంకు 'మోదీ పర్యటన' వ్యవహారం- విచారణకు పంజాబ్​ సర్కార్ కమిటీ!​