వ్యాక్సినేషన్​పై కేంద్రానికి సుప్రీం ప్రశ్నలు

కరోనా వ్యాక్సిన్​ల కోసం అనేక రాష్ట్రాలు గ్లోబల్ టెండర్లను ఆహ్వానిస్తున్న క్రమంలో.. ఇది ప్రభత్వ విధానమా అని కేంద్రాన్ని సుప్రీం కోర్టు ప్రశ్నించింది. కరోనా రోగులకు అత్యవసర ఔషధాలు సరఫరాపై సుమోటోగా కేసు విచారణ జరిపింది. కొవిన్ యాప్​లో పేరు నమోదుకు గ్రామీణ ప్రాంతాల్లో ఇబ్బందులు తలెత్తే అవకాశం ఉందని అభిప్రాయపడింది.

కరోనా టీకాల కోసం రాష్ట్రాలు.. గ్లోబల్ టెండర్లపై దృష్టి సారించిన నేపథ్యంలో.. ఇది ప్రభుత్వ విధానమా అని కేంద్రాన్ని సుప్రీం కోర్టు ప్రశ్నించింది. కరోనా రోగులకు అత్యవసర ఔషధాలు సరఫరాపై జస్టిస్ డీవై చంద్రచూడ్, జస్టిస్​ ఎస్ రవీంద్ర భట్, జస్టిస్ ఎల్ నాగేశ్వర్​రావుతో కూడిన ధర్మాసనం సుమోటోగా విచారణ చేపట్టింది.

వారికి ఇబ్బందులు..

టీకా తీసుకోవాల్సిన వారు.. కొవిన్ యాప్​లో తప్పనిసరిగా పేరు నమోదు చేసుకోవాలన్న ప్రభుత్వ నిబంధనలను సుప్రీం ప్రశ్నించింది. టీకా నమోదు ప్రక్రియలో గ్రామీణ ప్రాంతాల్లోని ప్రజలు ఇబ్బందులు పడొచ్చని పేర్కొంది. టీకా నమోదు విధానాన్ని ఎప్పటికప్పుడు సమీక్షించి.. ప్రజలకు అనుగుణంగా మార్చాలని సూచించింది.

ఫైజర్​తో చర్చలు..

ఈ ఏడాది చివరి నాటికి అర్హులైన వారందరికీ వ్యాక్సిన్ అందిస్తామని సుప్రీంకోర్టుకు సోలిసిటర్ జనరల్ తుషార్ మెహతా తెలిపారు. టీకాల కోసం అమెరికాకు చెందిన ఫైజర్​ సంస్థతో కేంద్రం సంప్రదింపులు జరుపుతోందన్నారు. చర్చలు ఫలిస్తే.. వ్యాక్సినేషన్​ పూర్తయ్యే గడువులో మార్పులు జరగవచ్చన్నారు.

ఇదీ చదవండి :దేశంలోని వివిధ రాష్ట్రాల్లో కరోనా ఆంక్షలివే..