1994 ఇస్రో గూఢచర్యం కేసును కేంద్ర దర్యాప్తు సంస్థ (సీబీఐ)కి అప్పగించింది సుప్రీంకోర్టు. ఇస్రో శాస్త్రవేత్త నంబి నారాయణన్‌పై పోలీసులు కుట్ర పన్నారన్న అభియోగాలపై సర్వోన్నత న్యాయస్థానానికి ముగ్గురు సభ్యుల అత్యున్నత కమిటీ నివేదిక సమర్పించింది. ఈ కమిటీకి జస్టిస్‌ డీకే జైన్‌ నేతృత్వం వహించారు.
కమిటీ నివేదికను సీబీఐకి అప్పగించాలని సుప్రీంకోర్టు గురువారం ఆదేశించింది. ఈ నివేదికలోని వివరాలను ప్రాథమిక దర్యాప్తు ఫలితాలుగా పరిగణించాలని పేర్కొంది. వాటి ఆధారంగా చర్యలు తీసుకునే అధికారాన్ని సీబీఐకి అప్పగించింది. ఈ కమిటీ నివేదికను బహిర్గతం చేయరాదని సుప్రీంకోర్టు స్పష్టం చేసింది. విచారణకు సంబంధించి 3 నెలల్లో నివేదిక అందించాలని సీబీఐని ఆదేశించింది.