'గుప్తనిధుల కోసమే 9 హత్యలు.. ఆ ఫ్యామిలీది ఆత్మహత్య కాదు.. విషమిచ్చి...'

Sangli Mass Suicide: కొద్దిరోజుల క్రితం.. ఒకే ఇంట్లో 9 మంది చనిపోయిన ఘటన మహారాష్ట్ర సాంగ్లీ జిల్లాలో జరిగింది. అప్పుడు ఆత్మహత్య అని అనుమానించిన పోలీసులు.. ఇప్పుడు హత్య అని స్పష్టం చేశారు. అసలు ఏమైంది? 9 మందిని ఎవరు, ఎందుకు చంపారు?

Sangli Mass Suicide: మహారాష్ట్ర సాంగ్లీ జిల్లాలోని మ్హైసాల్​లో ఒకే కుటుంబంలో 9 మంది మరణించిన ఘటనలో.. షాకింగ్​ విషయాలు వెలుగులోకి వచ్చాయి. వీరిది ఆత్మహత్య కాదని.. హత్య అని తేల్చారు పోలీసులు. ఈ ఘటనకు సంబంధించి ఇద్దరు మాంత్రికుల్ని అరెస్టు చేసినట్లు వెల్లడించారు ఎస్పీ దీక్షిత్​ గేడామ్​. గుప్తనిధుల కోసం.. వీరిపై విషప్రయోగం జరిపారని పేర్కొన్నారు. నిందితులు ధీరజ్​ చంద్రకాంత్​ సురవశే, అబ్బాస్​ మొహ్మద్​ అలీ బాగ్వాన్​ను అదుపులోకి తీసుకున్నారు.

జూన్​ 20న మ్హైసాల్​లోని ఒకే ఇంట్లో 9 మంది విగతజీవులుగా పడి ఉండటం కలకలం రేపింది. పశువైద్యుడు డా. మాణిక్​ యల్లప్ప వాన్మోర్​, పోపట్​ యల్లప్ప వాన్మోర్​, ఆయన తల్లి, భార్య, పిల్లలు సహా మొత్తం 9 మంది మృతదేహాలు ఒకే ఇంట్లో కనిపించాయి. అయితే.. మృతుడి జేబులో సూసైడ్​ నోట్​ చూసి ఆత్మహత్య కేసుగా నమోదు చేసుకున్నారు పోలీసులు.

మృతదేహాలు లభ్యమైంది ఈ ఇంట్లోనే

తదనంతర విచారణలో అసలు విషయాలు బయటపడ్డాయి. ఇంట్లో మృతదేహాలు పడి ఉన్న తీరు చూసి అనుమానంతో పలు కోణాల్లో దర్యాప్తు చేపట్టిన పోలీసులు.. వాన్మోర్​ కుటుంబానిది ఆత్మహత్య కాదు.. సామూహిక హత్యలు అని తేల్చారు. వారందరిపై విష ప్రయోగం చేసి, చంపేశారని వెల్లడించారు.

ఇవీ చూడండి:దేశంలో భారీ దాడులకు ఉగ్రకుట్ర.. ఆ భక్తులే టార్గెట్.. హోంశాఖ హైఅలర్ట్!