ED Inquiry in Delhi Liquor Scam Case: దిల్లీ మద్యం కేసులో ఈడీ దాఖలు చేసిన అనుబంధ ఛార్జిషీట్లను పరిగణనలోకి తీసుకున్నట్లు.. రౌస్‌ అవెన్యూలోని సీబీఐ ప్రత్యేక న్యాయస్థానం తెలిపింది. వాటిపై ఈనెల 10న విచారణ చేపట్టనున్నట్లు ప్రత్యేక న్యాయమూర్తి వెల్లడించారు. ఈ వ్యవహారంలో సేకరించిన అదనపు ఆధారాలతో.. ఏప్రిల్‌ 6న, 27న అనుబంధ ఛార్జిషీట్లను కోర్టులో ఈడీ దాఖలు చేసింది. అందులో ఇప్పటివరకు అరెస్ట్‌ చేసిన సమీర్‌ మహేంద్ర, శరత్‌చంద్రారెడ్డి, బినోయ్‌బాబు, విజయ్‌నాయర్, అభిషేక్‌ బోయిన్‌పల్లి, అమిత్‌అరోడా, గౌతమ్‌ మల్హోత్రా, రాజేష్‌జోషి, రాఘవ్‌ మాగుంట, అమన్‌ధల్, అరుణ్‌పిళ్లై, మనీష్‌ సిసోదియా పాత్రపై వివరించింది. కేసుతో సంబంధమున్న 38 మంది నుంచి సేకరించిన స్టేట్‌మెంట్లను పొందుపర్చినట్లు ఈడీ న్యాయవాదులు కోర్టుకు తెలిపారు.
Delhi Liquor Scam Update: 27 నాటి అనుబంధ ఛార్జిషీట్లో బీఆర్ఎస్ ఎమ్మెల్సీ కవిత పేరును ప్రస్తావించిన ఈడీ.. ఇండోస్పిరిట్‌ సంస్థతో ఉన్న సంబంధంపై వివరించింది. మాగుంట శ్రీనివాసులురెడ్డి, రాఘవ్‌ మాగుంట, శరత్‌చంద్రారెడ్డి, కవితల నేతృత్వంలోని సౌత్‌గ్రూప్‌.. ఆప్‌ నేతల ప్రతినిధి విజయ్‌ నాయర్‌కు రూ.100 కోట్ల ముడుపులు ముట్టజెప్పిందని.. అందుకు ప్రతిఫలంగా వచ్చిన లాభాల్ని కవిత తన ప్రతినిధి అరుణ్‌పిళ్లై ద్వారా హైదరాబాద్‌లో భూముల కొనుగోలుకు వినియోగించారని.. దర్యాప్తు సంస్థ పేర్కొంది. ఈ వ్యవహారంలో పాత్ర ఉన్నవారు దిల్లీ, హైదరాబాద్‌లో వివిధ చోట్ల సమావేశమైన తేదీ, వారి మధ్య నడిచిన కాల్‌ రికార్డులు, వాట్సాప్‌ సంభాషణలను జతచేసింది. అరుణ్‌పిళ్లై, బుచ్చిబాబు ఇచ్చిన స్టేట్‌మెంట్ల ఆధారంగా ఆ వివరాలు పొందుపరిచింది.
సౌత్‌గ్రూప్‌-ఆప్‌ నేతల మధ్య కుదిరిన ముందస్తు ఒప్పందంలో భాగంగానే రూ.100 కోట్లను ఆప్‌ ప్రతినిధి విజయ్‌నాయర్‌కు అడ్వాన్స్‌గా చెల్లించారని దర్యాప్తు సంస్థ పేర్కొంది. ఆ కారణం వల్లే పాత మద్యం విధానంలో హోల్‌సేలర్స్‌కి ఉన్న 5శాతం మార్జిన్‌ని కొత్తవిధానంలో 12 శాతంగా ఖరారు చేశారని తెలిపింది. L-1గా వచ్చిన ఇండోస్పిరిట్‌ డిస్ట్రిబ్యూషన్‌ లిమిటెడ్‌లో అరుణ్‌పిళ్లైకి 35.. ప్రేమ్‌రాహుల్‌ మండూరికి 32.5శాతం వాటా ఉందని.. అందులో కవిత తరఫున అరుణ్‌పిళ్లై.. మాగుంట శ్రీనివాసులురెడ్డి తరఫున ప్రేమ్‌రాహుల్‌ ప్రాతినిధ్యం వహించారని ఈడీ పేర్కొంది. ఇండోస్పిరిట్‌లో వచ్చిన లాభాల్ని కవిత ఆదేశాల మేరకు.. అరుణ్‌ పిళ్లై పెట్టుబడిగా మలిచారని తెలిపింది. ఫీనిక్స్‌ గ్రూప్‌నకు చెందిన శ్రీహరి నుంచి.. ఎన్‌గ్రోత్‌ క్యాపిటల్‌ పేరిట ఆస్తి కొన్నట్లు బుచ్చిబాబు... స్టేట్‌మెంట్‌లో పేర్కొన్నారు.
కవిత ఆదేశాల మేరకు అన్నీ: కవిత ఫీనిక్స్‌ సంస్థ సీఓఓ శ్రీహరి నుంచి.. 25 వేల చదరపు అడుగుల మరో ఆస్తి కొన్నట్లు ఈడీ తెలిపింది. ఆమె ఆదేశాల మేరకే సంబంధిత దస్తావేజుల పని బుచ్చిబాబు చూసుకున్నాడు. ఆ గ్రూప్‌లో కె కవిత.. ఆమె భర్త డీఆర్‌ అనిల్‌కుమార్‌ భాగస్వాములుగా ఉన్నారంది. ఆ ఆస్తి మార్కెట్‌ విలువ చదరపు అడుగుకు రూ.1,760 కాగా.. రూ.1,260 మాత్రమే చెల్లించారని ఈడీ ఛార్జీషీట్‌లో పేర్కొంది. వట్టినాగులపల్లిలోని క్రియేటివ్‌ డెవలపర్స్‌లో అరుణ్‌పిళ్లై రూ.5 కోట్లు పెట్టి.. 3-4 ఎకరాల భూమి కొన్నట్లు ఆ సంస్థ భాగస్వామి రవిశంకర్‌చెట్టి.. తన స్టేట్‌మెంట్‌లో వివరించారు.