Rickshaw Puller Murdered For Roti: దిల్లీలో దారుణ ఘటన వెలుగు చూసింది. రోటీ అడిగితే ఇవ్వలేదని రిక్షావాలాను.. మద్యం మత్తులో ఉన్న ఓ వ్యక్తి కత్తితో దారుణంగా పొడిచాడు. ఆసుపత్రిలో చికిత్స పొందుతూ బాధితుడు మరణించాడు. విషయం తెలుసుకున్న పోలీసులు.. నిందితుడ్ని అరెస్ట్ చేశారు.
పోలీసుల వివరాల ప్రకారం..కరోల్బాగ్ ప్రాంతంలో మంగళవారం రాత్రి.. మున్నా అనే రిక్షా నడుపుకునే ఓ వ్యక్తి స్థానిక హోటల్లో రోటీలు కొనుక్కున్నాడు. అనంతరం రోడ్డు పక్కన కూర్చొని తింటున్నాడు. అదే సమయంలో మద్యం మత్తులో వచ్చిన నిందితుడు ఫిరోజ్ ఖాన్.. మున్నాను ఓ రోటీ ఇవ్వమని అడిగితే ఇచ్చాడు. ఆ తర్వాత మరో రోటీ అడిగాడు నిందితుడు. అందుకు మున్నా నిరాకరించాడు. దీంతో వెంటనే కత్తి తీసి బాధితుడ్ని పొడిచి అక్కడి నుంచి పారిపోయాడు ఫిరోజ్.
అపస్మారక స్థితిలో పడి ఉన్న రిక్షావాలా మున్నాను స్థానికులు ఆసుపత్రికి తరలించారు. చికిత్స పొందుతూ అతడు మరణించాడు. విషయం తెలుసుకున్న పోలీసులు.. రంగంలోకి దిగారు. నిందితుడి కోసం పలుచోట్ల గాలింపు చేపట్టారు. ఆ తర్వాత స్థానికంగా ఉన్న పార్క్లో నిందితుడు నిద్రిస్తున్నట్లు తెలిసి అక్కడికి వెళ్లారు. వివిధ కోణాల్లో పోలీసులు విచారించగా.. ఫిరోజ్ నేరాన్ని ఒప్పుకున్నాడు. అతడ్ని అరెస్ట్ చేసిన పోలీసులు.. హత్యకు ఉపయోగించిన కత్తిని స్వాధీనం చేసుకున్నారు. ఘటన జరిగిన ఆరు గంటల్లోనే కేసును చేధించారు. నిందితుడు ఫిరోజ్ ఖాన్ ఉత్తర్ప్రదేశ్కు చెందినవాడని, మద్యానికి బానిసయ్యాడని పోలీసులు తెలిపారు.
ఇవీ చదవండి:11 ఏళ్ల బాలికపై గ్యాంగ్రేప్.. నాలుగేళ్ల చిన్నారిపై 69 ఏళ్ల వృద్ధుడు!
కుక్కను మింగేసిన 13 అడుగుల పైథాన్.. ఏనుగు హల్చల్..!
