టీకా పంపిణీపై ప్రధానికి ఆ రాష్ట్రాల సీఎంల లేఖ

కరోనా మహమ్మారి వేగంగా విజృంభిస్తున్న క్రమంలో టీకా పంపిణీపై దిల్లీ, మహారాష్ట్ర ముఖ్యమంత్రులు అరవింద్​ కేజ్రీవాల్​​, ఉద్ధవ్​ ఠాక్రేలు.. ప్రధానమంత్రి నరేంద్ర మోదీకి లేఖ రాశారు. టీకా పంపిణీ కేంద్రాలను పెంచేందుకు నిబంధనలు సడలించాలని, కనీస వయస్సును తొలగించాలని కేజ్రీవాల్​ కోరారు. 25 ఏళ్లు పైబడిన వారందరికీ వ్యాక్సిన్​ ఇవ్వాలని సూచించారు ఠాక్రే.

దేశ రాజధానిలో కరోనా కేసులు భారీగా నమోదవుతున్న క్రమంలో ప్రధానమంత్రి నరేంద్ర మోదీకి లేఖ రాశారు దిల్లీ ముఖ్యమంత్రి అరవింద్​ కేజ్రీవాల్​. టీకా పంపిణీ కేంద్రాలు ఏర్పాటు చేసేందుకు నిబంధనలను సడలించాలని, వ్యాక్సిన్​ పొందేందుకు కనీస వయస్సును తొలగించాలని కోరారు.

కేంద్రం నుంచి అవసరమైన అనుమతులు వస్తే.. నగర ప్రజలందరికీ మూడు నెలల్లో టీకా అందిస్తామని పునరుద్ఘాటించారు కేజ్రీవాల్​.

" దేశవ్యాప్తంగా కరోనా కేసుల పెరుగుదల కొత్త సవాళ్లను, ఆందోళనను పెంచుతోంది. మరింత వేగంగా వ్యాక్సినేషన్​ను కొనసాగించాలనుకుంటున్నాం. కొత్త కేంద్రాల ఏర్పాటు నిబంధనలు సడలింపు చేసి, ప్రతి ఒక్కరిని టీకా వేసుకునేందుకు అనుమతిస్తే.. దిల్లీ ప్రభుత్వం నగర పౌరులకు మూడు నెలల్లో వ్యాక్సిన్​ అందిస్తుంది. అందుకు తగినట్లుగా సిద్ధంగా ఉన్నాం. ప్రస్తుత తరుణంలో మరింత వేగంగా వ్యాక్సినేషన్​ చేపట్టాల్సిన అవసరం ఉంది. మా ఆందోళనను ప్రధాని అర్థం చేసుకుంటారనే నమ్మకం ఉంది. "

- అరవింద్​ కేజ్రీవాల్​, దిల్లీ ముఖ్యమంత్రి.

25 ఏళ్లుపైబడిన వారందరికీ టీకా ఇవ్వాలి: ఉద్ధవ్​

కరోనా మహమ్మారి విజృంభిస్తున్న తరుణంలో ప్రధానమంత్రికి లేఖ రాశారు మహారాష్ట్ర ముఖ్యమంత్రి ఉద్ధవ్​ ఠాక్రే. 25 ఏళ్లు పైబడిన వారందరికీ టీకా అందించాలని కోరారు. ఉపాధి కోసం ఇంటి నుంచి బయటకు వచ్చే యువతను కరోనా బారి నుంచి కాపాడుకోవాల్సిన అవసరం ఉందన్నారు. తమ రాష్ట్రానికి అదనంగా 1.5 కోట్ల డోసులు కేటాయించాలని డిమాండ్​ చేశారు. దాని ద్వారా.. ముంబయి సహా కేసులు అధికంగా ఉన్న 6 జిల్లాల్లో 45 ఏళ్లు పైబడిన వారందరికీ మూడు వారాల్లో టీకా పంపిణీ పూర్తి చేస్తామన్నారు.

ఇదీ చూడండి:మహారాష్ట్రలో కొత్తగా 47వేల మందికి కరోనా