రాజస్థాన్లోని టోంక్ జిల్లాలో అమానవీయ ఘటన వెలుగు చూసింది. అత్యాచార బాధితురాలైన ఓ మైనర్ సహా ఆమె తల్లిని నగ్నంగా మార్చి.. దాడి చేశారు నిందితుడి కుటుంబ సభ్యులు. ఈ కేసులో ముగ్గురు మహిళలు సహా ఐదుగురిని పోలీసులు అరెస్టు చేశారు.
ఏం జరిగింది?
టోంక్ జిల్లాలోని ఓ గ్రామానికి చెందిన 17 ఏళ్ల బాలికను అదే గ్రామానికి చెందిన ఓ యువకుడు అపహరించి, మారుమూల ప్రదేశానికి తీసుకువెళ్లి అత్యాచారానికి పాల్పడ్డాడు. ఈ విషయాన్ని పరిష్కరించే నెపంతో తల్లి, కుమార్తెను నిందితుడు తమ వద్దకు రావాలని పిలిచాడు. అలా వెళ్లిన వారిరువురిపై నిందితుడి అత్తమామలు క్రూరంగా ప్రవర్తించారు. వారిని నగ్నంగా మార్చి.. దాడికి దిగారు. ఈ ఘటనపై ఫిబ్రవరి 15న పోలీసులకు బాధితురాలు ఫిర్యాదు చేసింది. ఈ కేసుకు సంబంధించిన వివరాలను మల్పురా డీఎస్పీ చక్రవర్తి సింగ్ రాథోడ్ వెల్లడించారు.
"బాధితురాలికి వైద్య పరీక్షలు చేశాం. మూడుసార్లు నిందితుడు ఆమెను వేధించాడు. సొంత సామాజిక వర్గంలోని వారు కూడా తనను ఒత్తిడికి గురిచేశారని ఆమె చెప్పింది. నిందితుడికి ఇది వరకే వివాహమైంది. బాధితురాలితో అతడు చెడుగా ప్రవర్తించాడు. ఈ కేసును అన్ని కోణాల్లో దర్యాప్తు చేస్తున్నాం."
-డీఎస్పీ చక్రవర్తి సింగ్ రాథోడ్
ఈ కేసును తొలుత మహిళా ఫిర్యాదుల కమిటీ అధికారి అశోక్ బుటోలియా దర్యాప్తు చేపట్టారు. అనంతరం చక్రవర్తి సింగ్ రాథోడ్కు బదిలీ చేశారు. ఫిర్యాదు చేసి 22 రోజులు పూర్తైనప్పటికీ.. అశోక్ బుటోలియా ఎవరినీ అరెస్టు చేయలేదని బాధితురాలు ఆవేదన వ్యక్తం చేసింది. దీనిపై రాజస్థాన్ మాజీ ముఖ్యమంత్రి వసుంధరరాజే తీవ్రస్థాయిలో విమర్శలు చేశారు. ఇలాంటి ఘటనలు.. ప్రజల్లో భయాన్ని కల్గించడమే కాకుండా.. అవమానకరంగాను నిలుస్తాయని మండిపడ్డారు.
ఇదీ చూడండి:లోయలో పడ్డ బస్సు- 8 మంది మృతి
