రాజస్థాన్కు చెందిన ఒకే కుటుంబంలోని నలుగురు ఆత్మహత్యకు పాల్పడ్డారు. అత్యాచార ఆరోపణలతో ఓ వ్యక్తి.. మూడు నెలలపాటు జైలులో ఉండి రెండు రోజులు క్రితమే ఇంటికి వచ్చాడు. ఇద్దరు పిల్లలు, భార్యకు విషమిచ్చాడు. అనంతరం అతడు ఉరేసుకుని చనిపోయాడు.
బాంసవాఢాలోని పిఠాపుర్ గ్రామానికి చెందిన మోహన్ దామోర్ రాజ్కోట్లో కూలీగా పనిచేసేవాడు. అక్కడ ఒక మహిళతో పరిచయం ఏర్పడింది. మూడు నెలల క్రితం అదే మహిళ దామోర్పై అత్యాచారం చేసినట్లు కేసు పెట్టింది. దీంతో దామోర్ను మూడు నెలలుపాటు జైలులో ఉంచారు. అయితే రెండు రోజుల క్రితం పోలీసులు దామోర్ను విడిచిపెట్టారు. ఇంటికి చేరుకున్న దామోర్ తీవ్ర మనోవేదనకు గురయ్యాడు.
దామోర్ తన భార్య శారద(36), హరీష్(14), రాహుల్(5)కు విషం ఇచ్చాడు. ఆ తర్వాత దామోర్ ఇంట్లోనే ఉరివేసుకుని చనిపోయాడు. బంధువుల ఇంటికి వెళ్లిన దామోర్ తండ్రి నాథూ.. ఇంటికి వచ్చి చూడగా అసలు విషయం బయటపడింది. ఘటనపై కేసు నమోదు చేసుకున్న పోలీసులు దర్యాప్తు ప్రారంభించారు.
దుండగుల కాల్పుల్లో కానిస్టేబుల్, వ్యాపారి..
పంజాబ్లోని జలంధర్లో పట్టపగలే కొందరు దుండగుల కాల్పుల్లో ఇద్దరు చనిపోయారు. కొద్దిరోజులు క్రితం భుపేందర్ సింగ్ చావ్లా అనే వస్త్రాల వ్యాపారికి ఓ గ్యాంగ్స్టర్ ఫోన్చేసి.. రూ.20 లక్షల ఇవ్వాలని డిమాండ్ చేశాడు. లేదంటే చంపేస్తామని బెదిరించాడు. దీంతో చావ్లా పోలీసులకు ఫిర్యాదు చేశాడు. పోలీసులు.. చావ్లా భద్రతకోసం ఇద్దరు గన్మెన్లను నియమించారు.
అయితే బుధవారం చావ్లా దుకాణం నుంచి ఇంటికి వెళ్తుండగా.. నలుగురు వ్యక్తులు బైక్పై వచ్చి కాల్పులు జరిపారు. ఈ దాడిలో చావ్లా అక్కడికక్కడే మృతి చెందాడు. గన్మెన్గా ఉన్న మన్దీప్ సింగ్ అనే కానిస్టేబుల్ తీవ్రంగా గాయపడి ఆస్పత్రిలో చికిత్స పొందుతూ గురువారం మృతి చెందాడు. విషయం తెలుసుకున్న రాష్ట్ర సీఎం వీరమరణం పొందిన కానిస్టేబుల్ కుటుంబానికి రూ.1 కోటి పరిహారం ప్రకటించారు.
