మరో ఉద్యమానికి టికాయత్​ పిలుపు

రైతు సంఘం నాయకుడు రాకేశ్​ టికాయత్​ మరో ఆందోళనకు పిలుపునిచ్చారు. దేశవ్యాప్తంగా రైతులందరూ ట్రాక్టర్​ ఉద్యమానికి సిద్ధంగా ఉండాలని కోరారు. దిల్లీ ఎన్​సీఆర్​ ప్రాంతంలో పదేళ్లకు మించిన ట్రాక్టర్లు, డీజిల్​ వాహనాలపై జాతీయ హరిత ట్రైబ్యునల్ ఆంక్షలు విధించడాన్ని తప్పుబట్టారు.

కేంద్రం ప్రవేశపెట్టిన కొత్త వ్యవసాయ చట్టాలకు వ్యతిరేకంగా ట్రాక్టర్​ ఉద్యమానికి పిలుపునిచ్చారు రైతు సంఘం నాయకుడు రాకేశ్​ టికాయత్​. దిల్లీ సరిహద్దుల్లో కొనసాగుతున్న నిరసనల్లో భాగంగా దేశవ్యాప్తంగా ఉన్న రైతులు ఈ ఉద్యమంలో పాల్గొనాలని కోరారు. దిల్లీ ఎన్​సీఆర్​ ప్రాంతంలో పదేళ్లకు మించిన ట్రాక్టర్లు, ఇతర వాహనాల పై నిషేధం విధిస్తూ జాతీయ హరిత ట్రైబ్యునల్​ తీసుకున్న నిర్ణయంపై అసహనం వ్యక్తం చేశారు.

"ఇప్పటివరకు పొలాల్లో నడుస్తున్న ట్రాక్టర్లు ఇప్పుడు దిల్లీలోని ఎన్​జీటీ కార్యాలయం వైపు నడుస్తాయి. ఇప్పటివరకు వాహనాల వయసు ఎంత అని ఎవరూ అడగలేదు. కానీ ఇప్పటికిప్పుడు ఈ నిర్ణయం తీసుకోవడం వెనక ఉన్న కారణం ఏంటి? పదేళ్లకు మించిన పాత ట్రాక్టర్లను దశలవారీగా తొలిగించి కార్పొరేట్‌లకు సహాయం చేయాలా? ఇకపై ఆ ట్రాక్టర్లు కూడా సాగు చట్టాలకు వ్యతిరేకంగా చేస్తున్న ఉద్యమంలో భాగం అవుతాయి."

-రాకేశ్​ టికాయత్​, రైతు సంఘం నాయకుడు

సాగు చట్టాలకు వ్యతిరేకంగా జరుగుతున్న ఈ ఉద్యమంలో ఎక్కువ మంది రైతులు పాల్గొంటారని టికాయత్​ తెలిపారు. ఇటీవల చేపట్టిన ర్యాలీలో పాల్లొన్న 20వేల ట్రాక్టర్లు దిల్లీలోనే ఉన్నాయన్న ఆయన.. వాటిని 40 లక్షలకు పెంచడమే తమ తదుపరి లక్ష్యమని పేర్కొన్నారు. ట్రాక్టర్​ యజమానులందరూ 'ట్రాక్టర్​ క్రాంతి'లో భాగం కావాలని కోరారు. ప్రతి రైతు వారి వారి పొలం నుంచి మట్టిని ఆందోళనా స్థలానికి తీసుకురావాలని కోరారు​.

ఇదీ చూడండి:సాగు చట్టాల రద్దుపై కేంద్రానికి రైతుల డెడ్​లైన్