టీచర్స్​ డే రోజే ప్రధానోపాధ్యాయుడిపై కేసు.. కారణమేంటి?

విద్యాబుద్ధులు నేర్పే గురువు విద్యార్థులకు దేవుడితో సమానం. ఆ గురువును స్మరించుకునే రోజు(Teachers day) ఇది. ఓవైపు యావత్​ భారతావని ఉపాధ్యాయుల త్యాగాన్ని స్మరించుకుంటున్న తరుణంలో.. మధ్యప్రదేశ్​ రాజ్​గఢ్​ జిల్లాలోని ఓ ప్రభుత్వ పాఠశాల ప్రధానోపాధ్యాయుడిపై విద్యార్థులే కేసు పెట్టారు. ఆ గురువు చేసిన తప్పేంటి?

దేశమంతా ఉపాధ్యాయ దినోత్సవం(Teachers day 2021) ఘనంగా నిర్వహించుకుంటోంది. విద్యార్థులు తమకు విద్యాబుద్ధులు నేర్పిన గురువుల ఆశిస్సులు తీసుకుంటున్నారు. కానీ, మధ్యప్రదేశ్​, రాజ్​గఢ్​ జిల్లాలోని ఓ ప్రభుత్వ ఉన్నత పాఠశాల ప్రధానోపాధ్యాయుడిపై కేసు నమోదైంది. ఇంతకి ఏం జరిగింది? ఆయన చేసిన తప్పేంటి?

రాజ్​గఢ్​ జిల్లాలోని మచల్​పుర్​ ప్రభుత్వ ఉన్నత పాఠశాలలో ఉపాధ్యాయ దినోత్సవాన్ని పురస్కరించుకుని కొందరు బాలికలు యూనిఫాం కాకుండా సివిల్​ డ్రెస్​లో వచ్చారు. అది ప్రధానోపాధ్యాయుడు రాధేశ్యామ్​ మాలవియాకు నచ్చలేదు. విద్యార్థినులపై ఆగ్రహం వ్యక్తం చేశారు. రంగు బట్టలు ధరించిన విద్యార్థినులంతా.. సోమవారం నుంచి బట్టలు లేకుండా బడికి రావాలని ఆదేశించారు. సివిల్​ డ్రెస్​లో వచ్చి బాలురను చెడగొడుతున్నారని తిట్టారు. ఉపాధ్యాయుడి మాటలు విన్న విద్యార్థులు, మిగతా ఉపాధ్యాయులు ఆశ్చర్యానికి గురయ్యారు.

పాఠశాల ఎదుట ఆందోళన చేస్తున్న విద్యార్థినులు

ఉపాధ్యాయుడి మాటలపై విద్యార్థినులు ఆగ్రహం వ్యక్తం చేశారు. ఇతర తరగతుల విద్యార్థినులతో కలిసి పాఠశాలలో నిరసనకు దిగారు. స్కూల్​ నుంచి పోలీస్​ స్టేషన్​కు ర్యాలీగా తరలి వెళ్లి ఫిర్యాదు చేశారు. గతంలోనూ విద్యార్థినుల పట్ల అసభ్యకరంగా ప్రవర్తించినట్లు తెలిపారు. ప్రధానోపాధ్యాయుడు రాధేశ్యామ్​ మాలవియాపై పోక్సో చట్టం కింద కేసు నమోదు చేసినట్లు స్టేషన్​ ఇంఛార్జి జితేంద్ర అజ్నారే తెలిపారు.

ప్రస్తుతం ఉపాధ్యాయుడు పరారీలో ఉన్నారు. విషయం తెలుసుకున్న ఉన్నతాధికారులు అతన్ని సస్పెండ్​ చేశారు.

ఇదీ చూడండి:'ఉత్తమ ఉపాధ్యాయులే జాతి నిర్మాతలు'