కొవిడ్‌(Covid)తో ఇంటి పెద్ద దిక్కును కోల్పోయిన చిన్నారులు, మహిళలకు రాజస్థాన్ ప్రభుత్వం ఊరటనిచ్చే కబురు వినిపించింది. ముఖ్యమంత్రి కరోనా బల్‌ కల్యాణ్‌ యోజన పథకం ద్వారా వారికి ఆర్థిక భరోసా కల్పించనున్నట్టు అశోక్ గహ్లోత్‌ సర్కారు శనివారం ప్రకటించింది.
తక్షణ సహాయం-రూ.1 లక్ష
కరోనా కారణంగా తల్లిదండ్రులను పోగొట్టుకున్న పిల్లలకు తక్షణ ఆర్థిక సహాయం కింద రూ.1 లక్ష అందజేయనున్నట్టు వెల్లడించింది. ఆ చిన్నారులకు 18 ఏళ్ల వయసు వచ్చే వరకు నెలకు రూ.2,500 చొప్పున భృతిని కూడా అందించనున్నట్లు పేర్కొంది. వారికి 18 ఏళ్లు నిండిన తర్వాత ఉచితంగా ఉన్నత విద్యతో పాటు రూ.5 లక్షల ఆర్థిక సహాయం అందజేయనున్నట్టు వివరించింది.