'వారికి ఫ్రీగా డబ్బులు ఇవ్వాల్సిందే!'

కేంద్ర ప్రవేశపెట్టిన ఉద్దీపన ప్యాకేజీపై కాంగ్రెస్​ నేతలు రాహుల్​ గాంధీ, చిదంబరం విమర్శలు గుప్పించారు. ఈ ప్యాకేజీ ద్వారా కేంద్రం మరోసారి మోసానికి పాల్పడిందని ఆరోపించారు. ప్రస్తుత పరిస్థితుల నుంచి బయటపడాలంటే ప్రజలకు నగదు పంపిణీ చేయమడమే పరిష్కారమని చిదంబరం సూచించారు.

ఉద్దీపన చర్యల కింద కేంద్రం సోమవారం ప్రవేశపెట్టిన ప్యాకేజీపై కాంగ్రెస్​ నేత రాహుల్​ గాంధీ తీవ్ర విమర్శలు చేశారు. అది ప్యాకేజీ కాదని.. కేంద్రం చేసిన మరో మోసం అని వ్యాఖ్యానించారు. ప్రభుత్వ ప్యాకేజీని సామాన్యులు తమ రోజువారీ అవసరాలకు ఉపయోగించుకోలేరని పేర్కొన్నారు. ట్విట్టర్​ ద్వారా రాహుల్ మంగళవారం​ ఈ వ్యాఖ్యలు చేశారు.

'డబ్బు పంపిణీ చేయండి'

ప్రస్తుత పరిస్థితుల్లో పేద, మధ్య తరగతి వారికి డబ్బు అందించడం ఒక్కటే మార్గమని.. ఈ తరహా ప్యాకేజీలతో ఉపయోగం లేదని కాంగ్రెస్​ సీనియర్​ నేత చిదంబరం పేర్కొన్నారు.

"రుణాలు ఇవ్వటం వల్ల ఉపయోగం లేదు. అది లబ్ధిదారులకు మరింత భారంగా మారుతుంది. బ్యాంకులు కూడా ఇందుకు సుముఖత చూపించవు. ఇప్పటికే రుణ భారంతో సతమతం అవుతున్న వారు మరో అప్పు కోరుకోరు. ఆ స్థానంలో పెట్టుబడి అవసరం. సరఫరా ఎక్కువ ఉంటే డిమాండ్​ పెరగదు. అందుకు భిన్నంగా డిమాండ్​పైనే సరఫరా ఆధారపడి ఉంటుంది."

-చిదంబరం, కాంగ్రెస్​ సీనియర్ నేత

ఉద్యోగాలు పోయి, ఆదాయం తగ్గిన చోట డిమాండ్​ పెరగదని చిదంబరం తెలిపారు. ప్రస్తుత పరిస్థితుల్లో నగదు పంపిణీ ఒక్కటే పరిష్కారం అని సూచించారు.

కరోనా రెండో దశ నేపథ్యంలో ఉద్దీపన చర్యల కింద కేంద్రం సోమవారం రూ.6.28 లక్షల కోట్ల ప్యాకేజీని ప్రకటించింది.

ఇదీ చదవండి :'అప్పటి వరకు ఒకే దేశం- ఒకే రేషన్ అమలు కావాల్సిందే'