'ప్రజల గొంతుకను అణచివేసేందుకు కేంద్రం కుట్ర'

Parliament opposition protest: 12మంది ఎంపీల సస్పెన్షన్​కు నిరసనగా పార్లమెంట్​ నుంచి విజయ్​ చౌక్​ వరకు ర్యాలీ నిర్వహించారు విపక్ష నేతలు. ప్రభుత్వ వైఖరికి వ్యతిరేకంగా నినాదాలు చేశారు. ప్రజల గొంతుకను అణచివేసేందుకు ప్రభుత్వం ప్రయత్నిస్తోందని రాహుల్​ గాంధీ మండిపడ్డారు.

Opposition protest outside parliament: కేంద్ర ప్రభుత్వం.. ప్రజాస్వామ్యాన్ని హత్య చేసేందుకు ప్రయత్నిస్తోందని, ప్రజల గొంతుకను అణచివేస్తోందని కాంగ్రెస్​ సీనియర్​ నేత రాహుల్​ గాంధీ మండిపడ్డారు. దేశానికి సంబంధించిన కీలక విషయాలను పార్లమెంట్​లో ప్రస్తావించేందుకు విపక్షానికి అవకాశమే ఇవ్వడం లేదన్నారు.

12మంది ఎంపీల సస్పెన్షన్​పై పార్లమెంట్​ ఆవరణంలోని గాంధీ విగ్రహం వద్ద విపక్షాలు మంగళవారం నిరసన చేపట్టాయి. అనంతరం పార్లమెంట్​ నుంచి విజయ్​ చౌక్​ వరకు ప్లకార్డులు పట్టుకుని ఎంపీలు ర్యాలీ నిర్వహించారు. కేంద్రానికి వ్యతిరేకంగా నినాదాలు చేశారు. నిరసనల్లో పాల్గొన్న రాహుల్​ గాంధీ.. ప్రధానమంత్రి నరేంద్ర మోదీ ప్రభుత్వంపై తీవ్రస్థాయిలో ఆరోపణలు చేశారు.

"దేశంలో ప్రజా గొంతుకను అణచివేసేందుకు కేంద్రం ప్రయత్నిస్తోందని చెప్పడానికి ఎంపీల సస్పెన్షన్​ నిదర్శనం. ఎంపీల గొంతును నొక్కేస్తున్నారు. వారు ఎలాంటి తప్పు చేయలేదు. ముఖ్యమైన అంశాలను పార్లమెంట్​లో చర్చించేందుకు మాకు అనుమతినివ్వడం లేదు. పార్లమెంట్​లో చర్చలు లేకుండానే బిల్లుల మీద బిల్లులు ఆమోదం పొందుతున్నాయి. పార్లమెంట్​ను నడిపే విధానం ఇది కాదు. ప్రధాని సభకు రావడం లేదు. జాతీయస్థాయిలో ముఖ్యమైన విషయాలను ప్రస్తావించేందుకు మాకు అవకాశం లభించడం లేదు. ప్రజాస్వామ్యాన్ని హత్యచేస్తున్నారు."

-- రాహుల్​ గాంధీ, కాంగ్రెస్​ సీనియర్​ నేత.

రాజ్యసభ వాయిదా..

Parliament opposition protest: పార్లమెంట్ శీతాకాల సమావేశాలు మొదలైనప్పటి నుంచి విపక్షాలు నిరసనలు చేస్తున్నాయి. ఈ క్రమంలో పెద్దల సభ కార్యకలాపాలు దెబ్బతిన్నాయి. తాజాగా.. మంగళవారం కూడా విపక్ష ఎంపీలు ఆందోళనలు చేశారు. వెల్​లోకి వెళ్లి తమ నిరసన తెలిపారు. వారి వైఖరిని ఉపరాష్ట్రపతి వెంకయ్య నాయుడు తప్పుబట్టారు. పార్లమెంట్​ విలువలకు తగ్గట్టు ప్రవర్తించాలని కోరారు. అయినప్పటికీ ఫలితం లేకపోవడం వల్ల సభను మధ్యాహ్నం 2 గంటల వరకు వాయిదా వేశారు.

'ఇప్పటికైనా సభకు రండి'

విపక్షాల నిరసనలపై కేంద్రమంత్రి ప్రహ్లాద్​ జోషి స్పందించారు. ఇప్పటికైనా జరిగిన పరిణామాలపై విచారం వ్యక్తం చేయాలని, సభకు రావాలని కాంగ్రెస్​ సహా ఇతర పార్టీ నేతలకు సూచించారు. అన్ని విషయాలపై చర్చించేందుకు ప్రభుత్వం సిద్ధంగా ఉందని స్పష్టం చేశారు.

ఇవీ చూడండి:-మోదీ ఖాతా హ్యాక్​పై పార్లమెంట్ స్థాయీసంఘం ప్రశ్నలు