కాంగ్రెస్ నేత రాహుల్ గాంధీపై అనర్హత వేటుకు నిరసనగా దేశవ్యాప్తంగా ఆందోళనలు కొనసాగుతున్నాయి. విపక్ష ఎంపీలు పార్లమెంట్ ఆవరణలోని గాంధీ విగ్రహం వద్ద నిరసన చేశారు. నల్లటి వస్త్రాలు ధరించి రాహుల్కు మద్దతుగా నినాదాలు చేశారు. అదానీ కుంభకోణంపై విచారణ జరపాలంటూ డిమాండ్ చేశారు. విపక్ష ఎంపీలంతా పార్లమెంట్ నుంచి విజయ్ చౌక్ వరకు ర్యాలీగా వెళ్లారు. గాంధీ విగ్రహం వద్ద జరిగిన ఆందోళనల్లో కాంగ్రెస్ అధ్యక్షుడు మల్లికార్జున ఖర్గే, ఆ పార్టీ మాజీ అధినేత్రి సోనియా గాంధీ నిరసనల్లో పాల్గొన్నారు. దేశంలో ప్రజాస్వామ్యాన్ని ప్రధాని మోదీ అంతం చేస్తున్నారని ఖర్గే ఆరోపించారు. మోదీ తొలుత స్వయం ప్రతిపత్తి సంస్థలను ఆయన అంతం చేశారని.. ఎన్నికల్లో గెలిచినవారిని బెదిరించి ఆ స్థానంలో సొంత ప్రభుత్వాలను ఏర్పాటు చేస్తున్నారని ధ్వజమెత్తారు. తమకు లొంగనివారి కోసం ఈడీ, సీబీఐలను రంగంలోకి దించుతున్నారని అన్నారు. ఆ విషయాన్ని ఎత్తి చూపేందుకే తామంతా నల్ల వస్త్రాలు ధరించి నిరసన చేస్తున్నామని చెప్పారు.
అంతకుముందు కాంగ్రెస్ ఎమ్మెల్యేలంతా పార్లమెంట్లోని కాంగ్రెస్ పార్లమెంటరీ పార్టీ కార్యాలయంలో భేటీ అయ్యారు. ఖర్గే, సోనియా అధ్యక్షతన జరిగిన ఈ మీటింగ్కు.. ఆ పార్టీ ఎంపీలు హాజరయ్యారు. మరోవైపు, కాంగ్రెస్ సహా విపక్ష పార్టీలన్నీ కలిసి ప్రత్యేకంగా సమావేశమయ్యాయి. టీఎంసీ, బీఆర్ఎస్, సమాజ్వాదీ, డీఎంకే, వామపక్షాలు ఈ భేటీకి హాజరయ్యాయి. పార్లమెంట్లో అనుసరించాల్సిన వ్యూహాలపై చర్చించాయి. రాహుల్ గాంధీపై అనర్హత, అదానీ వివాదంపై ఉభయ సభల్లో ఎలా ముందుకెళ్లాలనే విషయంపై సమాలోచనలు జరిపాయి. బడ్జెట్ సమావేశాల్లో విపక్ష పార్టీల మధ్య ఏర్పడ్డ సయోధ్య.. పార్లమెంట్ వెలుపలా కొనసాగాలని కాంగ్రెస్ ఆశాభావం వ్యక్తం చేసింది.
రాహుల్ గాంధీపై అనర్హత వేయడాన్ని వ్యతిరేకిస్తూ పార్లమెంట్లోనూ ఆందోళనలు కొనసాగించారు విపక్ష ఎంపీలు. అదానీ గ్రూప్పై విచారణ జరపాలని డిమాండ్లు చేశారు. ఫలితంగా లోక్సభ మధ్యాహ్నం 4 గంటలకు వాయిదా పడింది. రాజ్యసభ మధ్యాహ్నం 2 గంటలకు వాయిదా వేశారు.
నల్ల వస్త్రాలతోనే అసెంబ్లీకి
వివిధ రాష్ట్రాల్లోనూ రాహుల్కు మద్దతుగా ఆందోళనలు కొనసాగాయి. ఒడిశాలో కాంగ్రెస్ ఎమ్మెల్యేలు నల్ల వస్త్రాలు ధరించి అసెంబ్లీలకు వెళ్లారు. బిహార్, తమిళనాడు రాష్ట్రాల్లో కాంగ్రెస్ ఎమ్మెల్యేలు నలుపు వస్త్రాలు ధరించి ర్యాలీలు తీశారు.