కాలంతో పాటు ప్రజల్లో సంగీతం పట్ల అభిరుచి పెరుగుతూ వస్తోంది. దీనికి చక్కని ఉదాహరణగా.. సంగీతం పట్ల అమితమైన అభిమానాన్ని మాటల్లో చెప్పలేని ఓ సంగీత ప్రియుడు.. ఇల్లునే గిటారు రూపంలో నిర్మించి చూపించాడు. ఆ ఇంటిని చూస్తే.. అబ్బా ఏముందిరా అనిపిస్తుంది. ఒక్కమాటలో చెప్పాలంటే.. సంగీతానికి నిలువెత్తు రూపం ఆ ఇల్లు.
ఆ గిటారిల్లు- ఓ సంగీత ప్రపంచం..
ఉత్తరాఖండ్ హరిద్వార్లోని ధర్మనగరికి చెందిన రాహుల్ అరోరాకు సంగీతం అంటే ప్రాణం. గిటారు వాయించడం అంటే మహా ఇష్టం. అందుకే అతని ఇంటిని ఏకంగా గిటార్ హౌస్గా మార్చేశాడు. ఆ ఇంటిని మినీ సంగీత ప్రపంచం అని పిలవడంలో అతిశయోక్తి లేదు. ఇంటి వెలుపల భాగాన్ని గిటారు ఆకృతిలో నిర్మించగా.. పియానో, డ్రమ్స్, వయొలిన్ వంటి సంగీత వాయద్యాలతో ఉన్న లోపల గదులు గొప్ప అనుభూతిని కలిగిస్తాయి. దీంతో ఆ ప్రాంతంలో ఎంతో ఆకర్షణగా కనిపిస్తుంది ఆ ఇల్లు.
రాహుల్ అరోరా మంచి సంగీతకారుడని, డబ్బు తీసుకోకుండా పేద పిల్లలకు సంగీతం నేర్పుతాడని స్థానిక ప్రజలు అంటున్నారు. సంగీతంలో ప్రతిభావంతులు కావాలనుకునే పిల్లలకు.. రాహుల్ ఒక ప్రేరణ అని చెబుతున్నారు.
ఇదీ చూడండి:ఆ కార్డులతో యాచకులు, దివ్యాంగులకు ఉచిత భోజనం
