Punjab Polls: 'ఆప్​ సీఎం అభ్యర్థిని నిర్ణయించేది ప్రజలే'

Punjab Election AAP: పంజాబ్​ అసెంబ్లీ ఎన్నికల కోసం ఆప్ ముఖ్యమంత్రి అభ్యర్థి ఎవరనేది నిర్ణయించేది ప్రజలేనని ఆ పార్టీ జాతీయ కన్వినర్ అరవింద్ కేజ్రీవాల్ పేర్కొన్నారు. సీఎం అభ్యర్థిపై ప్రజలు తమ సూచనలు తెలియజేసేందుకు ప్రత్యేక నంబర్​ను విడుదల చేశారు.

AAP in Punjab 2022: పంజాబ్​ అసెంబ్లీ ఎన్నికల నేపథ్యంలో తనదైన శైలిలో ప్రజలను ఆకట్టుకునే ప్రయత్నాలు చేస్తున్నారు ఆమ్​ ఆద్మీ పార్టీ (ఆప్​) అధినేత అరవింద్​ కేజ్రీవాల్​. బుధవారం.. 10 అంశాలతో ఆప్​ 'పంజాబ్​ మోడల్'ను ఆవిష్కరించిన కేజ్రీవాల్​.. తాజాగా ఓటర్లకు ఓ ప్రతిపాదన చేశారు. రాష్ట్రానికి ముఖ్యమంత్రి అభ్యర్థిగా ఎవరిని నియమించాలో సూచించాలని ప్రజలను కోరారు. ఈ నెల 17 తేదీ సాయంత్రం 5 గంటల్లోపు 70748 70748 ఫోన్​ నంబరుకు ఫోన్​ లేదా మెసేజ్​ చేసి ప్రజలు తమ సూచనలు తెలియజేయవచ్చని పేర్కొన్నారు. ఈ మేరకు ఓ యాప్​ను లాంచ్ చేసినట్లు తెలిపారు.

Arvind Kejriwal Punjab Elections

"ముఖ్యమంత్రి అభ్యర్థి ఎంపికకు ఓ పార్టీ.. ప్రజాభ్రిపాయాన్ని కోరడం 1947 తర్వాత ఇదే తొలిసారి. జనవరి 17 సాయంత్రం 5 గంటల లోపు 70748 70748 నంబరుకు వాట్సాప్ మెసేజ్​, ఫోన్​ ద్వారా తమ సలహాలు సూచనలు తెలియజేయవచ్చు. ప్రజల సూచనలు ఆధారంగా పార్టీ సీఎం అభ్యర్థిని ఎంపిక చేస్తాం. నా వ్యక్తిగత అభిప్రాయం కంటే ప్రజల ఎంపికే ముఖ్యం."

-అరవింద్​ కేజ్రీవాల్​, ఆప్ జాతీయ కన్వినర్

Punjab AAP CM candidate: పంజాబ్​ సీఎం అభ్యర్థిగా భగవంత్​ మాన్​ను ఎంపిక చేయాలని అనుకుంటున్నట్లు కేజ్రీవాల్​ వెల్లడించారు. అయితే సీఎం అభ్యర్థిపై తన వ్యక్తిగత అభిప్రాయం కంటే ప్రజల ఎంపికే ముఖ్యమన్నారు.

Punjab Assembly Elections

"భగవంత్​ మాన్​ నాకు చాలా సన్నిహితుడు. సోదరుడి వంటి వారు. పంజాబ్​ సీఎం అభ్యర్థిగా భగవంత్​ మాన్​ను ఎంపిక చేయాలని అనుకుంటున్నాను. అయితే దీనిపై తుది నిర్ణయం ప్రజలదే" అని పేర్కొన్నారు.

ఎన్నికల అనంతరం పంజాబ్​లో అతిపెద్ద పార్టీగా ఆమ్ ఆద్మీ అవతరిస్తుందని వివిధ సర్వేల్లో వెల్లడైందన్నారు కేజ్రీవాల్. రాష్ట్రంలో ఆప్​ అధికారంలోకి వస్తుందని దాదాపుగా ఖరారైందన్నారు. తమ పార్టీకి ఒక్క అవకాశం ఇవ్వాలని.. భారీ మెజారిటీతో గెలిపించాలని విజ్ఞప్తి చేశారు. 60 స్థానాల్లో ఆప్​ గెలుస్తుందని జోస్యం చెప్పారు.

ఇదీ చూడండి:భాజపా సీఈసీ భేటీ- యూపీ ఎన్నికల అభ్యర్థుల ఖరారుపై కసరత్తు