ఖలిస్థానీ సానుభూతిపరుడు, 'వారిస్ పంజాబ్ దే' అధినేత అమృత్పాల్ సింగ్ కోసం పంజాబ్ పోలీసులు ముమ్మరంగా గాలిస్తున్నారు. ఈ నేపథ్యంలో అతడిని పరారీలో ఉన్న నిందితుడిగా పోలీసులు ప్రకటించారు. అమృత్పాల్ స్వస్థలమైన అమృత్‌సర్లోని జల్లుపుర్‌ ఖేరాలో అతడి ఇంటి వద్ద పోలీసులు భారీగా మోహరించారు.
మరోవైపు.. రాష్ట్రంలో సోమవారం మధ్యాహ్నం వరకు ఇంటర్నెట్ సేవలను తాత్కాలికంగా నిలిపివేస్తున్నట్లు పంజాబ్ ప్రభుత్వం ఉత్తర్వులు జారీ చేసింది. ఆదివారం మధ్యాహ్నం వరకు సేవలు నిలిపివేత ఉండగా.. దాన్ని సోమవారం మధ్యాహ్నం వరకు పొడగించింది. బ్యాంకింగ్, వైద్యం, ఇతర అత్యవసర సేవలకు అంతరాయం కలగకుండా ఉండేందుకు బ్రాడ్బ్యాండ్ సేవలను నిలిపివేయడం లేదని పేర్కొంది. ప్రస్తుతం యావత్ పంజాబ్ రాష్ట్రం.. పోలీసు పహారాలో ఉంది. 'అమృతపాల్ సింగ్ ప్రస్తుతం పరారీలో ఉన్నాడు. అతడిని పట్టుకునేందుకు గాలింపు చర్యలు చేపడుతున్నాం. త్వరలోనే అతడిని అరెస్ట్ చేస్తాం. అమృత్పాల్కు చెందిన రెండు వాహనాలను సీజ్ చేశాం. అలాగే భారీగా ఆయుధ సామగ్రిని స్వాధీనం చేసుకున్నాం' అని జలంధర్ పోలీస్ కమిషనర్ కుల్దీప్ సిన్హా చాహల్ అన్నారు.
పంజాబ్లో అరెస్టైన ఖలిస్థానీ సానుభూతిపరుడు అమృతపాల్ సింగ్ నలుగురు అనుచరులను ప్రత్యేక విమానంలో అసోంలోని దిబ్రూగఢ్ జైలుకు తరలించినట్లు పోలీసులు తెలిపారు. ప్రజలు సంయమనం పాటించాలని పోలీసులు కోరారు. ఎలాంటి తప్పుడు సమాచారాన్ని షేర్‌ చేయొద్దని విజ్ఞప్తి చేశారు.
ఇప్పటి వరకు ఖలీస్థానీ నేత అమృత్ పాల్ అనుచరుల్లో 78 మందిని పోలీసులు అదుపులోకి తీసుకున్నారు. వీరిలో అతడి ఆర్థిక వ్యవహారాలను చూసుకునే దల్జీత్‌ సింగ్ కూడా ఉన్నాడు. దల్దీత్ సింగ్ను హరియాణాలోని గురుగ్రామ్లో పోలీసులు అరెస్ట్ చేశారు. అలాగే అమృత్పాల్కు సెక్యూరిటీగా ఉన్న మరో ఏడుగురిని సైతం పోలీసులు పట్టుకున్నారు.